Old Tibetan Documents Online

Pt_1287/200-399

(200) འུང་ནས། བཙན་པོ་སློན་བཙན་གྱྀས༎ རྩང་བོད་ཁྱིམ་ཉི་གྲྀ༎ ཟུ་ཙེ་གློ་བ་ཉེ་བ་འི་བྱ་དགའར་སྩལ་ཏོ༎ འུང་གྀ་འོག་དུ༎
(201) བཙན་པོ་མཆེད་གཉིས་ལ༎ མོང་སྔོན་པོ་གློ་བ་རྀངས་པ། ཟུ་ཙེ་གློ་བ་ཉེ་བས་དཀུའ་བེལ་ནས༎ བཙན་པོ་མཆེད་
(202) གཉྀས་ཀྱི་སྐུ་ལ་མ་དར་པར༎ མོང་སྔོན་པོ་བཀུཾ་སྟེ༎ ཟུ་ཙེ་གློ་བ་ཉེ་འོ༎ ཟིང་པོ་རྗེ་སྲིད་བརླག་པ་འྀ་བློ་ལའ།
(203) གཐོགས་ཏེ༎ ཟུ་ཙེ་གློ་བ་ཉེ་འོ༎ འུང་གྀ་རྗེས་ལ་དགས་པོ་འབངས་སུ་མངའ་བ་ལས་ལོག་གོ༎ འུང་ནས་རྗེ་
(204) བློན་ཡོངས་སུ་འདུས་ཏེ༎ དགས་པོ་ལྷ་དེ་དགུག་པ་འྀ་བཀའ་གྲོས་མཛད་ནས། དམག་པོན་སུས་བྱ་ཞེས་བློད་ན༎
(205) སེང་གོ་མྱི་ཆེན་གྱྀས༎ ཁོ་བོས་རྔོ་ཐོག་ཆེས་ཁས་བླངས་སོ༎ འུང་ནས་ཁྱུང་པོ་སྤུང་སད་ན་རེ༎ ཁྱོ་འདའས།
(206) དམག་པོན་འོང་ངམ། མྱྀ་འཛངས་པ་གོ༎ སྒྱེ་འུ་ནང་དུ་སྨྱུང་བུ་བཅུག་པ་དང་མཚུངས་ཤེས་བྱ་ན༎ ཁྱོ་འདའ།
(207) བཙན་པོ་འི་སྣམ་པྱྀ་པར་བཀའ་སྩལ་ནས༎ ལོ་དུ་མ་ཞིག་ལོན་ན༎ འཛངས་རྔོ་ཐོག་གོ་ཞེས༎ མྱྀ་ཆིག་གྀས།
(208) བསྟོད་པ་ཁོ་བོས་མ་ཐོས་ན༎ ཁྱོ་འདའས་མྱྀ་འོང་བ་ལ་བསྒྲེ་བསྒྲེ་སྟེ༎ འབངས་ཆབ་འཚལ་བར་མཆི་འོ༎
(209) ཞེས་བྱས་སོ༎ མྱྀ་ཆེན་ན་རེ༎ མྱི་ཡོངས་ཀྱིས་ཁོ་བོ་ལ་སྙན་དུ་མྱི་བརྗོད་པ་ཡང་བདེན་ནོ༎ ཁོ་བོ་སྔོན་
(210) སྒྱེ་འུ་ནང་དུ་ཞུགས་ཀྱང་མ་ཞུགས། རྩེ་མོ་པྱིར་མ་བྱུང་བ་ཡང་བདེན་ནོ༎ ཁོ་བོ་སྔོན་སྒྱེ་འུ་ནང་དུ་ཞུགས་
(211) སུ་ཟིན་ན༎ རྩེ་མོ་བས་ཡུ་བ་ཕན་ཆད་པྱུང་སྟེ་སོང་ཟིན་ནོ༎ འུང་གྀས་དེང་ཁོ་བོས་གསོལ་བ་ཡང༎
(212) སྔོན་ཇི་འི་ནང་དུ་ཡང་མ་ཞུགས་པས༎ གདོད་འཇུག་པར་གསོལ་བ་ཡྀན་ནོ་ཞེས་བྱས་སོ༎ འུང་ནས༎
(213) བཙན་པོས་ཀྱང། མྱི་ཆེན་གསོལ་བ་བཞིན་གནང་ནས༎ དགས་པོ་ དགུག་པ་འྀ་དམག་པོན་དུ་བཀའ།
(214) སྩལ་ཏོ༎ འུང་ནས་མྱི་ཆེན་གྱིས༎ དགས་པོ་ལྷ་དེ་ལ་བརྒལ་ཏེ༎ དགས་པོ་ཡོངས་སུ་བཀུག་སྟེ༎ མྱི་ཆེན་
(215) གྱི་བྱ་དགའར༎ གསེར་ཁུང་རེ་འུ་རྒལ་གྱི་མྱི་དང་འབྲོག་དུ་བཆས་ཏེ་སྩལ་ཏོ༎ འབྲོང་ཆེ་པོ་རྔུལ་གྱི་རྭ་མྱི།
(216) ཡོངས་ཀྱི་ཁ་ བརྗོད་ན༎ མྱི་ཆེན་གྱྀས༎ དགས་ཀྱི་བསེན་མཁར་ལ༎ མདུང་མོ་ཐབས།
(217) གཆིག་གྀས། འབྲོག་མོ་ཐང་གང་ཐོབ༎ པྱོགས་རྔེག་སུམ་བརྩན་སྐྱ་བོ་རེང་གིས། དཔའ་བ་འྀ་པུལ་
(218) པྱིན་ན༎ ཉྀན་ཆིག་ལ་དགས་པོ་མྱི་བརྒྱའ་བསད་ཆེས་འུང་སྐད་དོ༎ འུང་གྀ་རྗེས་ལ། མྱང་སྨོན་ཏོ་
(219) རེ་གློ་བ་ཉེ་བའྀ་བུ༎ ཞང་སྣང་བཙན་པོ་འི་ཞ་འབྲྀང་སྣང་མ་པ་འཚལ་ཞྀང་མཆིས་སོ༎ འུང་གྀ་རྗེས་ལའ༎
(220) བཙན་པོ་རྗེས་འབངས་དགྱེས་སྐྱེམས་སྟོན་མོ་གསོལ་ལོ༎ འུང་གྀ་ཚེ་ཁྱུང་པོ་སྤུང་སད་ཀྱིས་ཀླུ་བླངས་པ་འྀ༎
(221) ཚིག་ལ༎ མོན་ཀ་འྀ་ནི་སྟག་ཆིག་པ། སྟག་བཀུམ་ནྀ་ཟུ་ཙེས་བཀུམ། གུང་བཀྲོས་ནྀ་པྱག་དུ་པུལ། སླ་ལྦོ་ནི།
(222) རྔེགས་སྩལད༎ རྩང་བྲང་ནྀ་ཡ་སྟོད་ཀྱི་ཐང་པྲོམ་ནྀ་རྒོད་ལྡིང་བའ༎ རྒོད་བཀུཾ་ནྀ་ཟུ་ཙེས་བཀུམ༎ རྒོད་
(223) ནྀ་པྱག་དུ་པུལ། གསབ་གསོབ་ནྀ་ལྷོ་རྔེགས་སྩལད༎ ན་ནྀང་ནི་གཞེ་ནྀང་སྔ༎ ཏྀ་སེ་ནི་གངས་དྲུང་
(224) ནས༎ ཤ་དང་ནྀ་རྐྱང་བྱེར་བའ༎ ཤམ་པོ་ནྀ་རྩ་ལ་བྱེར༎ དྀ་རིང་ནྀ་སང་ལྟ་ན་ཤམ་པོ་ནི་གཉན་གྱྀ་རྩ༎ ཤ་རྐྱང་
(225) ནྀ་ཚས་མ་ངན༎ ཤ་རྐྱང་ནྀ་ཚས་ངན་ན༎ ཏི་སེ་ནྀ་གངས་ཀྱིས་[བླུན(/བྲུན)]༎ ན་ནིང་ནྀ་གཞེ་ནིང་སྔོན། མ་པང་ནྀ་མཚོ་
(226) འགྲམ་ནས། ངང་དང་ནྀ་ངུར་བྱེར་བ༎ དང་ཀོ་ནི་མཚོ་ལ་བྱེར༎ དྀ་རིང་ནྀ་སང་ལྟ་ན། དང་ཀོ་ནི་ལྷ་འྀ་མཚོའ༎
(227) ང་ངུར་ནྀ་ཚས་མ་ངན། ང་ངུར་ནྀ་ཚས་ངན་ན། མ་པང་ནྀ་མཚོ་འིས་[བླུན(/བྲུན)]༎ ལྷོ་རྔེགས་ནྀ་འཕན་གྱི་སྣོན།
(228) སེ་ཁྱུང་ནྀ་འཕན་གྱིས་བཏབ༎ སྔ་ན་ནྀ་འཕན་བ་ལ། ད་ཙམ་ནྀ་སྤྱན་ཡང་ཡས། དབུ་པྱིང་ནྀ་གྲོ་བོ་ལ།
(229) ཐ་མ་ནི་ བསྐོརད། ཟུ་ཙེ་ནི་སྩལ་ལགས་ཀྲང། ཀླུ་དེ་ཞེས་ ༎ འུང་ནས་བཙན་པོ་འི་
(230) ཐུགས་ལ་དགོངས་པ༎ བློན་པོ་ལྷོ་རྔེགས་གཆིག་གྀས་ལན་བླན་བར་ཐུགས་རེ་བ་ལས། སུས་ཀྱང་མ་
(231) བླན་ཏོ༎ འུང་ནས་ཞང་སྣང་པེ་འུ་ཟུར་འབྲིང་པོ་བཆས་པ་ཙམ་ཞིག༎ སྣང་མ་ལྟོམ་ཞིང་མཆིས་པ་ལ༎
(232) ཁྱོད་ཕ་སྙིང་ཉེ་བ་འྀ་བུ་ན༎ ཀླུ་ཤེས་སམ་ཞེས་རྨས་པ་དང༎ ཞང་སྣང་གིས་མཆིད་འཚལ་ཞེས་གསོལ་ཏོ༎
(233) ཞང་སྣང་གྀས་ཀླུ་བླངས་པ༎ ཀྱེ་ན་ནིང་ནྀ་གཞེ་ནིང་སྔ༎ ཆབ་ཆབ་ནྀ་ཕ་རོལ་ན༎ ཡར་ཆབ་ནྀ་ཕ་རོལ་ན།
(234) དགུ་གྲྀ་ནི་ཟིང་པོ་རྗེ༎ ཉ་ལས་ནྀ་ཁམ་དུ་བཀོད། ཁམ་ལས་ནྀ་རྨེག་དུ་བཏའ༎ སྐྱི་ནས་ནྀ་ཉ་འདོན་པ།
(235) དབྱི་ཚབ་ནྀ་པངས་ཏོ་རེ༎ ཀླུམ་ན་ནྀ་ཆབ་གཆོད་པ། ཙེང་སྐུ་ནྀ་སྨོན་ཏོ་རེ། ཁུར་ར་ནྀ་རགས་ཐོགས་ཤྀང་
(236) དོག་གྀ་ནི་ས་སྐྱེད་པ༎ པང་སུམ་ནྀ་འདྲོན་པོ་ཞིག། ཐང་ལ་ནྀ་རྩེ་བཆད་ཆིང། ཤམ་པོ་ནི་རྨེད་དུའ།
(237) བསྣན༎ ཡུ་སྣ་འྀ་ནི་མཁར་པབ་ཆྀང་པྱིང་བ་འྀ་ནྀ་སྣོན་དུ་བགྱིས། སྔ་ན་ནྀ་མཐོ་བ་ལ། ད་ཙམ་ནི་
(238) དགུང་ལ་རེག༎ ངས་པོ་ནི་སྒང་དྲས་ཤྀང། ཡར་མོ་ནི་ཁོལ་དུ་སྩལད། སྔ་ན་ནྀ་ཆེ་བ་ལ་ད་ཙམ་ནི་
(239) མཐའ་ཡང་ཡས༎ ལྷོ་རྔེགས་ནི་འཕན་གྱི་སྣོན། ལྡོང་ཏོང་ནྀ་འཕན་གྱིས་བཏབ། སྔ་ན་ནྀ་འཕན་བ་
(240) ལ། ད་ཙམ་ནི་སྤྱན་ཡང་ཡས། ན་ནྀང་ནི་གཞེ་ནིང་སྔ༎ ཕོ་མ་འྀ་ནི་འབྲོང་བཀུཾ་བ། ལྷོ་ཤིང་ནི་
(241) སྨྱུག་མོ་རྒྱལ༎ ལྕགས་ཀྱྀས་ནྀ་མ་དྲལ་ན༎ སྨྱུག་གྀས་ནི་རེ་མྱི་པུགས༎ རྒོད་ཀྱིས་ནི་
(242) མ་བསྒྲོན་ན། འབྲོང་ལ་ནྀ་རེ་མྱི་འཇེན༎ ངས་པོ་ནི་ར་ཡུལ་གྱི། ཀོམ་ཙེ་ནི་གཟིག་མོ་
(243) རྒྱལ༎ ཁབ་ཀྱིས་ནྀ་མ་པུག་ན། རྒྱུས་ཀྱིས་ནྀ་རེ་མྱི་པུགས། རྒྱུས་ཀྱིས་ནི་མ་
(244) དྲངས་ན། ཀོམ་ཙེ་ནྀ་ཉིད་མྱི་འཇོ་ཞེས་གླུ་བླངས་ནས༎ ཚིག་དེས། བཙན་པོ་
(245) ཐུགས་ ༎ མྱང་ཞང་སྣང་བློན་པོར་བཅུག་ནས། བློན་པོ་འི་མཚན་མར་
(246) ཡང་ གྱི་པུག་བུ་ཆུང་ ༎
(247) ༄༅། ༔། འུང་གྀ་རྗེས་ལའ༎ དབའས་ཕངས་ཏོ་རེ་དབྱི་ཚབ་རྒས་ཏེ། ཉྀ་མ་འདེ་ཞིང་མཆིས༎ བཙན་པོ་ཁྲྀ་སྲོང་བརྩན།
(248) ཉེན་ཀར་ནས། སྐྱི་ལུང་དུ་གཤེགས་ཀར༎ ཕངས་ཏོ་རེ་དབྱི་ཚབ་གྱིས༎ པྲྀན་སྙ་ཏོ་རེ་གཙུག་བློན་ལས་གསོལ་ཏེ༎
(249) གནའ་ཟྀང་པོ་རྗེ་རྒྱབ་དུ་བོར༎ སྤུ་རྒྱལ་ཕང་དུ་ལེན་ལེན༎ ཆབ་སྲིད་ཆུར་ནྀ་བསྲིངས། ཞེང་དུ་ནྀ་བསྐྱེད་བསྐྱེད་ན༎
(250) མྱང་གྀས་སྲིད་མ་ཐུབ་སྟེ༎ བཀྱོན་ཕབ་ནས། བདག་ཆག་སྤད་མཚན། བླར་གློ་བ་མ་རིངས། མཐང་མ་གྲང་ཞིང་
(251) མཆྀས་ན༎ ད་རོ་ལས་བལྟས་ན་ནི་ཉམ་ཆུང༎ རྨ་ལས་བལྟས་ན་ཕོག་སྙ་ཆེ་ཞིང་མཆྀས་ན༎ བདག་རྒན་པོ་ཙམ་
(252) ཞྀག་མ་གུམ་བར༎ དབུ་སྙུང་ཁུད་པ་ཙམ་གསོལ༎ བུ་ཚ་བྲོ་ཁུད་བར་སྩལད་པར་ཇྀ་གནང༎ བཙན་པོ་ཡབ་
(253) ནྀ་ མཆིས་བྲང་དུ་གདན་བཏིང་ཡང་གནང་ན༎ ད་ཤུལ་ཡོགས་སུ། ལ་མོ་ཆག་པ་པྲུམ་དུ་པྱག་ཐབ་ཙམ་
(254) ཞྀག་གསོལ་དུ་ཇི་གནང་ཞེས་གསོལ་ནས༎ དེ་ཙམ་ན་མྱང་དང་ཅོག་རོ་སྟོད་རྀམས་ལ་བཀྱོན་དབབ་པར་བགྱིས་སྟེ༎ ཁྲ་ཁྲུག་
(255) རྗེས་ལ་བབ་པས༎ གསོལ་དགུང་ཡང་གནང་སྟེ༎ བཙན་པོ་ཞ་སྔ་ནས༎ བཀའ་སྩལད་པའ༎ མྱི་དྲིན་
(256) [---]མྱྀ་ནི་སྙིང་མྱྀ་གཆད༎ རྟ་ལྟེ་འུ་རྟ་ནྀ་སྒལ་མྱི་དབྱུང༎ སྔ་ན་ང་འྀ་ཡབ་ཀྱི་རྀང་ལ༎ འབྲིང་ཐོ་རེ་སྦུང་བརྩན།
(257) དང༎ ཕངས་ཏོ་རེ་དབྱི་ཚབ་དང་ཁྱེད་གཉྀས༎ ཆབ་ཕ་རོལ་ཚུ་རོལ་གྱི༎ གུང་བློན་འཚོལ་ཆིག་པར་དགོད།
(258) དགོད་པ་ལས། འབྲིང་ཏོ་རེ་སྦུང་བརྩན་ནྀ་ཤི༎ ཁྱོད་ནྀ་རྒས་སྟེ་ཉྀ་མ་འདེར་གནང་སྟེ་བཞག༎ མྱང་ཞང་
(259) སྣང་བློན་ཆེར་བསྐོས་ཏེ་བཞག་ན༎ ཡབ་ནོངས་ནས། མྱང་གིས་ཀྱང་གློ་བ་ ། བཀྱོན་ཕབ་པའ།
(260) ཡྀན་ནོ། ད་ཁྱེད་དབའས་ཕ་ཆྀག་ནི༎ གདོའ་ཐག་གཉྀས་སུ། གློ་བ་མ་རིངས་པས༎ ལ་མོ་ཆག་པ་པྲུམ་དུ་
(261) པྱག་ཐབ་ཀྱང་གསོལ་ཆིག༎ དབུ་སྙུང་ཡང་གནང་ངོ་ཞེས་བཀའ་སྩལ་ཏོ༎ ལ་མོ་ཆག་པ་པྲུམ་དུ༎ རྩང་
(262) པྱེད་པུབ་སྟེ༎ པྱག་ཐབ་གསོལ་ཏོ༎ སྐུ་རྟེན་དུ་ཁྲབ་བསེའ་སྣ་བཅུ་དང། ལྡོང་པྲོམ་གྱི་རལ་ མདོར་ཅོད།
(263) གཉིས་གསོལ་ཏོ༎ བཙན་པོས་དབུ་སྙུང་ཡང་གནང་ངོ༎ དབའས་དབྱི་ཚབ་སྤུན་མཚན་བདུན་ཡང་བྲོ་
(264) སྩལ་ཏོ༎ བཙན་པོས་བཀའ་སྩལད་པ༎ དབྱྀ་ཚབ་གློ་བ་ཉེ་བས༎ གུམ་ན་མཆད་པྱག་དར་ཏེ་བརྩིག་པར་གནང།
(265) རྟ་ནྀ་བརྒྱའ་དགུམ་བར་གནང༎ བུ་ཚ་གང་རུང་བ་གཆིག༎ གསེར་གྱྀ་ཡི་གེ་མྱྀ་ཆད་པར་སྩལད་པར་བཀའ།
(266) སྩལ་ཏོ༎ བཙན་པོ་ཞ་སྔ་ནས༎ མགུར་བླངས་པའ༎ ཡར་མོ་ནི་ཆུ་ཐུངས་ཀྱིས༎ མདོ་ནས་ནྀ་རྩང་དུ།
(267) བསྲིང། ཡར་མོ་ནི་ཞེང་ཆུངས་ཀྱིས། ལྷོ་ནས་ནྀ་བྱང་དུ་བསྐྱེད༎ འཐམ་འཐམ་ནྀ་འདུ་འདུ་ན། ངག་རྗེས་ནྀ་མྱིས་
(268) མྱྀ་བརྗོད༎ འགྲོ་འགྲོ་ནི་འཆམ་འཆམ་ན༎ ཆགས་ལྷམ་ནྀ་ཆུས་མྱྀ་སྣང། ད་ནས་ནི་ཕན་ཆད་དུ། ཁྱོད་
(269) ནྀ་ང་མ་གཏང། ང་འྀས་ནི་ཁྱོད་མྱྀ་གཏང༎ ང་འྀས་ནི་ཁྱོད་བཏང་ན༎ དགུང་མཐའྀ་ནི་སྲུང་དུ་རུང༎ ཁྱོད་ཀྱིས་ནྀ་
(270) [ང?]བཏང་ན༎ ངས་པོ་ནྀ་རྨད་དུ་རུང་ཞེས་བཀའ་སྩལ་ཏོ༎ དེ་ནས་དབའས་དབྱི་ཚབ་ཀྱིས་མཆྀད་བླངས་པ།
(271) བཙན་དུ་ནྀ་བདག་འཚལ་ན། ཆུང་ན་ནི་རྗེ་ཁུར་ཆིག༎ པྱུག་དུ་ནྀ་བདག་འཚལ་ན༎ ལྷ་རྀ་ནི་གཡང་སྐྱོང་
(272) ཤྀག༎ རྗེ་འྀས་ནི་བཀའ་སྩལ་ན་གཞའ་མ་ནྀ་ཡུན་ཀྱི་སྲིད༎ བྱ་འྀས་ནི་ཞུ་པུབ་ན་ལ་པྱི་ནི་གདངས་སུ་དྲོ༎
(273) ཞེས་མཆིད་བླངས་ནས༎ སྤད་མཚན་བདུན་གྱྀས་གཏང་རག་ཆེད་པོ་བཏང་ངོ༎ དབུ་སྙུང་གནང་བ་འི་གོར་
(274) མ་པྱག་དུ་བོན་པ་ནྀ༎ རྒྱལ་འབྲྀང་ལན་ཏོན་གྱིས་ པྱག་དུ་གསོལ་ནས། གོར་མ་དཀར་པོ་དངོས་
(275) ནྀ༎ དབྱྀ་ཚབ་ཀྱི་མཆད་པ་འྀ་རྨང་དུ་ ༎ ཞང་ལོན་ཞ་འབྲིང་དུ་བྲོ་འདོར་འདོར་བ། ཁུ་ཁྲྀ་དོ་རེ་སྨྱང་
(276) ཟུང་དང། གནུབས་སྙ་དོ་རེ་གཙུག་བློན་དང། རྔེགས་རྒྱལ་འབྲིང་ལན་ཏོན་དང། ཚེས་པོང་ཁྲི་བཙན་ཁོང་སྟོ།
(277) དང། འོ་མ་ལྡེ་ཁྲི་བཟང་ལོད་བཙན་དང། ཁུ་སྨོན་ཏོ་རེ་ཕངས་ཚབ་དང། རྗེ་བློན་བདུན་གྱིས་དེ་ལྟར་དབུ་སྙུང།
(278) གནང་ངོ༎ དབུ་སྙུང་གནང་བ་འྀ་ཚིག་ནི། ད་པྱིན་ཆད་ཁྱེད་སྤད་མཚན་གྱིས༎ བཙན་པོ་སྤུ་རྒྱལ་གྱི་ཞ།
(279) སྔར། གློ་བ་མ་རྀངས་ མ་གྲང་ན༎ ནམ་ནམ་ནམ་ནམ། ཞ་ཞ་ཞ་ཞར་ཡང། དབྱྀ་ཚབ་གྱི་བུ་ལ་
(280) མ་ཉེས་པར་བཀྱོན་དབབ་རེ། འཕྲའ་མ་མྱི་དག་གསན་རེ། འཕྲའ་མ་ཞིག་གསན་ན་ཡང། ཤགས་བྱ་སྟེ།
(281) ཡུས་བཀྲོལ་ནས༎ བཀའས་མྱྀ་གཆད་རེ༎ དབྱྀ་ཚབ་ཀྱི་བུ་ཚ་ལ་ལ་ཞིག་གིས། མ་བསམས་སྟེ་སྙིང་
(282) རྀངས་ན་ཡང༎ གང་སྙིང་རྀངས་པ་ཉི་ཙེ་འི་སྒོར་མྱི་བཀྱོན་རེ༎ གཞན་བློ་ལ་མ་གཐོགས་པ་རྣམས་
(283) ལ། བཀྱོན་རེ། ཕག་དང་མཚུངས་མཚོན་གྱིས་མྱྀ་དགར་རེ། བྱ་དང་མཚུངས་ཁྱུས་བདའ་རེ། མ་ཉེས་
(284) པ་ཞྀག་གིས་རྔོ་ཐོག་ན༎ བསྐྱུང་རེ་སྨད་རེ༎ དབྱི་ཚབ་ཀྱི་བུ་གཆིག་ལ། གསེར་གྱི་ཡྀ་གེ་ལས་སྨད་རེའ༎
(285) ཁོལ་ཡུལ་ཡང་མ་ཉེས་པར་དཔྲོག་རེ༎ སྙྀང་མ་རིངས་པར་རབས་ཆད་ན། ཁོལ་ཡུལ་བཞེས་རེའ༎
(286) ཁྱེད་གློ་བ་རིངས་ན་དབུ་སྙུང་ལ་མ་གཐོགས༎ ཁྱེད་ཀྱིས་ཁོལ་ཡུལ་ཞིག་བརྗེས་སམ་པུལ་ན། དབུ་
(287) སྙུང་ལ་མ་གཐོགས། ནམ་ནམ་ནམ་ནམ། ཞ་ཞ་ཞ་ཞར། སྲས་དབོན་གྱི་ཞ་སྔར་འདྀ་བཞིན་དུ་
(288) གནང་ངོ༎ དབྱྀ་ཚབ་སྤད་སྤུན་བྲོ་སྩལད་པའ། བཙན་པོ་སྤུ་རྒྱལ་ཁྲྀ་སྲོང་བརྩན་ཡབ་སྲས་དང།
(289) གདུང་རྒྱུད་ལ། གློ་བ་འདྲིང་རེ། ནམ་ནམ་ཞ་ཞར་ཡང༎ དབོན་སྲས་རྒྱལ་པོ་གང་མཛད་པ་ལ། གློ་བ་འདྲྀང་
(290) རེ༎ གཞན་མྱྀ་འོ་ཆོག་ལ་རྗོ་བོ་ལྷག་པ་ཚོལ་རེ༎ གཞན་གློ་བ་འདྲྀང་བར་སེམས་པ་དང་བློད་རེ།
(291) ཟས་ཀྱྀ་དོན་བཞག་པ་དང། དུག་དུ་བསྲེ་རེ། བཙན་པོ་ཁྲི་སློན་བཙན་ལ། ངག་སྣ་ཆིག་འཚལ་རེའ༎
(292) ཕུ་མ་ནུ་དང། བུ་ཚ་ལ་ལ་ཞིག་གྀས༎ སྙིང་རྀངས་སུ་བྱེད་ན༎ སྙིང་རིངས་སོ་ཞེས་ཀྱང་མྱི་འཐོལ་
(293) རེའ། པུ་ནུ་སྙྀང་རིངས་པ་འྀ་གྲོགས་བྱེད་རེ༎ བཙན་པོ་ལ་གཞན་ཞིག་སྙིང་རིངས་པར་ཚོར་ན་ཡང།
(294) མྱྀ་འཐོལ་རེ། པུར་མྱྀ་མ་ནོངས་པ་ལ༎ འཕྲའ་མ་དང་འཕྲག་དོག་མཆི་རེ། དཔོན་དུ་བཅུག་ནའ།
(295) འབངས་སོ་ཆོག་ལ་སྙིང་སྙོམས་པར་མྱྀ་འཚལ་རེ༎ བཙན་པོས་བཀའ་ཇྀ་སྩལད་པ་གཟུངས་སུ་
(296) མྱྀ་འཛིན་རེ་ཞེས་བྲོ་སྩལད་ཏོ༎ བྲོ་བོར་བ་ནྀ། དབྱི་ཚབ་དངོས་དང། བུ་བསེ་དོ་རེ་ཉ་སྟོ། སྣང་ཏོ་རེ་སུམ་
(297) སྣང། ཁྲྀ་སུམ་རྗེ་ཅུང། མང་རྗེ་བཙན་ཟུང༎ ཚ་བོ་སྟག་པོ་རྗེ་མྱེས་སྣང། མང་པོ་རྗེ་པུ་ཚབ། དང་བདུན་
(298) གྱིས་བྲོ་བོར་རོའ༎
(299) ༄༅༎ བཙན་པོ་སྲོང་བརྩན་སྒམ་པོའི་རིང་ལ༎ ཡབ་འབངས་ནྀ་འཁུས། ཡུམ་འབངས་ནྀ་ལོག༎
(300) གཉེན་ཞང་ཞུང། མཛོ་སུམ་པ༎ ཉག་ཉྀ་དགས་པོ༎ རྐོང་པོ། མྱང་པོ་ཀུན་ཀྱང་ལོག༎ ཡབ་གནམ་
(301) རྀ་སློན་མཚན་དུག་བོན་ཏེ་བཀྲོངས་སོ༎ སྲས་སྲོང་བརྩན་སྐུ་གཞོན་མ་ཕན་ཏེ༎ གཟོད་མ་
(302) དཀུའ་བ་དང། དུག་པ་རྣམས་རབས་བཆད་དོ༎ དེ་འི་རྗེས་ལ། དེ་འྀ་མྱི་ལོག་ཀུན་ སླར་བཀུག་
(303) གོའ༎ འུང་གྀ་འོག་དུ་མྱང་མང་པོ་རྗེ་ཞང་སྣང་གྀས། སུམ་པ་མཐའ་དག་ གདབ་མྱི་
(304) དགོས་པར། ལུག་རྟུག་གིས་སྒྱུ་ཕབ་སྟེ། ལྕེ་འྀ་ཐོར་ཐོ་ལ་བརྗོད་ནས། ཁྱྀམ་གྲངས་མ་ཤོར་པར་
(305) ཡོངས་ཀྱིས་འབངས་རྣལ་མར་བཀུག་གོ༎ འུང་གྀ་འོག་དུ་བཙན་པོ་ཞབས་ཀྱིས་བཙུགས་སྟེ༎
(306) བྱང་ལམ་དུ་མ་བྱུང་མ་དྲངས་པར༎ རྒྱ་དང་འ་ཞས་དཔྱའ་གཅལ་ལོ༎ ཐོག་མ་འ་ཞ་དེ་ནས་འབངས་
(307) སུ་མངའ་འོ༎ འུང་གྀ་འོག་དུ་བཙན་པོ་སྲོང་བརྩན་དང། མང་པོ་རྗེ་ཞང་སྣང་རྗེས་འབངས་
(308) ཀྱི་བར་དུ༎ ཁྱུང་པོ་སྤུང་སད་ཀྱིས་འཕྲའ་མ་བཅུག་སྟེ། བཙན་པོ་ཞ་སྔར། ཞང་སྣང་གློ་བ་མྱི་འདྲྀང་དུ་
(309) ནྀ་འདྲིང་ཞེས་གསོལ་ཏོ༎ ཞང་སྣང་ལ་བཙན་པོ་མྱི་བཀྱོན་དུ་བཀྱོན་ཞེས་བྱས་སོ༎ འུང་ནས།
(310) ཞང་སྣང་གྀ་གློ་བ་ལ། ཁྱུང་པོ་སྤུང་སད་བདག་དང་ཤག་རག་པོ་སྟེ། སྤུང་སད་ཟེར་བ་བདེན་སྙམ་ནས།
(311) བཙན་པོ་འི་བཀའ་བྱུང་ན་ཡང། ན་ཞེས་བྱ་སྟེ། མཁར་སྡུར་བར་ཐེན་ཏེ་མཆིར་མ་རུང་ངོ༎ འུང་
(312) ནས༎ བཙན་པོ་ཞ་སྔ་ནས༎ ཞང་སྣང་གློ་བ་འདྲྀང་ཡང་དག་ཆེས་བཀའ་སྩལ་ནས། ཞང་སྣང་
(313) གྀ་མཁར་སྡུར་བ་ཡང་བསྡིགས་སོ༎ འུང་ནས་ཞང་སྣང་གི་བྲན། པ་ཚབ་གྱིམ་པོ་ །
(314) ཞང་སྣང་བརླག་གོ༎ མཁར་སྡུར་བ་ཡང་བཤིག་གོ།
(315) ༄༅༎ འུང་གྀ་འི་འོག་དུ༎ ཁྱུང་པོ་སྤུང་སད་ཟུ་ཙེས༎ མྱང་ཞང་སྣང་བཙན་པོ་ལ་གློ་བ་རིངས་པ༎ ཟུ་ཙེས་དཀུའ་བེལ་ཏེ༎ ཞང་སྣང་བཀུམ་སྟེ༎ ཟུ་ཙེ་
(316) གློ་བ་ཉེ་འོ༎ བཙན་པོ་འི་བློན་པོ་འི་ནང་ན༎ ཁྱུང་པོ་སྤུང་སད་ཟུ་ཙེ་ལས་གློ་བ་ཉེ་བ་སྔོན་ཆད་མ་བྱུང་ངོ༎ ཟུ་ཙེ་འཛངས་ཤེ་ན་འཛངས༎ དཔའ་
(317) ཞེ་ན་དཔའ་འོ༎ ཆུ་གང་ཆེ་ཞེ་ན་ཆེ༎ ཡང་བ་རྀང་ཞེ་ན་ ༎ མྱྀ་ཆིག་ལ་ཚོགས་དགུའ་ཚོགས་ན༎ སྤུང་སད་ཟུ་ཙེ་འོ༎ འུང་གྀ་འོག་དུ།
(318) བཙན་པོ་འདྀ་འི་རིང་ལ༎ ཁྱུང་པོ་སྤུང་སད་ཟུ་ཙེ་ལྟ་ཞྀག༎ རྒས་ཏེ་ཉི་མ་འདེར་གནང་ངོ༎ བཙན་པོ་ཞ་སྔར་ཁྱུང་པོ་སྤུང་སད་ཀྱིས་གསོལ་པའ།
(319) སྔོན་བཙན་པོ་འི་ཡབ་གནམ་རྀ་འི་རིང་ལ༎ རྩང་བོད་འབངས་སུ་བཀུག་པ་ལྟ་ཞིག༎ ཡབ་ཀྱིས་སྤྱན་གྱྀས་མ་གཟིགས༎ ཞབས་
(320) ཀྱྀས་མ་བཆགས་ན༎ བཙན་པོ་སྲས་ཀྱྀས་སྤྱན་གྱྀས་གཟིགས༎ ཞབས་ཀྱྀས་ ༎ སྡུམ་པ་ཁྲྀ་ ༎ དགྱེས་སྐྱེམས།
(321) སྟོན་མོ་གསོལ་དུ་ཇྀ་གནང་ཞེས་གསོལ་ནས༎ བཙན་པོས་སྤུང་སད་གསོལ་བ་བཞིན་གནང་སྟེ༎ མགར་ཡུལ་ཟུང་ཕོ་བྲང་ས་འདྲིར་
(322) བཀའ་སྩལ་ནས༎ ཡུལ་ཟུང་ཁྲི་བོམས་སུ་མཆིས་ཏེ། བརྟགས་ན༎ དཀུ་གང་པུབ་པར་ཡུལ་ཟུང་གྀས་ཚོར་ནས༎ ཡུལ་ཟུང་སླར་
(323) བཙན་པོ་འི་སྙན་དུ་གསོལ་ཏོ༎ ཡུལ་ཟུང་སླར་བྲོས་པ་འྀ་རྗེས་ལ༎ ཁྱུང་པོ་སྤུང་སད་རང་ གུམ་ནས། མགོ་བཆད་དེ༎ བུ་ངག་
(324) རེ་ཁྱུང་བསྐུར་ནས༎ སྐུར་མཁར་པྱིང་བར་མཆྀས་སོ༎ བཙན་པོ་འི་སྙན་དུ་ངག་རེ་ཁྱུང་གྀས་གསོལ་པའ༎ ཕ་རྒས་ཀྱི།
(325) ལ་གར༎ བཙན་པོ་འི་ཞ་སྔར་གློ་བ་རྀངས་ནས༎ ཚམས་བསྡལ་བར་ཆད་པའ༎ མགར་ཡུལ་ཟུང་ལ་འཐོལ་བར་བགྱིས་པ་ལས།
(326) ཡུལ་ཟུང་གྀས་ཀྱང་ཚོར་ཏེ། ཡུལ་ཟུང་ནྀ་སླར་མཆིས༎ ཕ་བཀུམ་ནས༎ མགོ་བཆད་དེ་མཆིས་ན༎ སྲིད་མྱི་བརླག་
(327) པར་ཇྀ་གནང་ཞེས་གསོལད་ཏོ༎ བཙན་པོ་ཁྲི་སྲོང་བརྩན་གྱིས་ཀྱང༎ ངག་རེ་ཁྱུང་གིས་གསོལ་པ་བཞིན་གནང་སྟེ༎ སྲྀད་མ་ །
(328) ༄༅། ༔། བཙན་པོ་ཁྲི་འདུས་སྲོང༎ སྐུ་ཆུང་ནས་གཞོན་གྱིས་ཀྱང༎ ཕག་རྒོད་ལ་བཤན་གྱྀས་མཛད། གཡག་རྒོད་སྒོག་དུ་བཅུག༎
(329) རྣ་བ་ལ་བཟུང་བ་ལ་སྩོགས་པའ༎ ཐུགས་སྒམ་བ་འྀ་སྟེང་དུ། སྐུ་རྩལ་ཆེད་པོས་བསྣན་ཏེ། མྱྀ་དང་མྱི་འདྲའ་བར་འཕགས་
(330) པས༎ ཉྀ་ངོག་རྒྱལ་པོ་ཐམས་ཆད་དང། འབངས་མགོ་ནག་པྱོགས་ཀྱིས༎ མཚན་བླ་དགས་འཕྲུལ་གྱི་རྒྱལ་པོ་ཞེས།
(331) ། བཀའ་མཆིད་ཀྱི་དཔེར་བརྗོད་དོ༎ མགར་ལ་སྩོགས་པ་བློན་པོ་ཁ་ཆིག་གློ་བ་འདྲྀང་ན༎ ཐུགས་སྒམ་བ་དང།
(332) དབུ་རྨོག་བརྩན་པོས་གཉེར་ནས༎ གློ་བ་རྀངས་པ་ཐམས་ཆད་བཀྱོན་ཕབ་སྟེ༎ པྱག་ན་ཆབ་སྲིད་སྔོན་བས་ཀྱང།
(333) མཐོ༎ དྲུ་གུ་ལ་སྩོགས་སྟེ་ཉྀ་ངོག་གཞན་འབངས་སུ་བཀུག་ཅིང། དཔྱའ་ཕབ་པ་དང། མཁར་སྲ་བ་ཕབ།
(334) ཡུལ་པྱུག་པོ་བཅོམ་སྟེ་ཆབ་སྲིད་ལེགས་པ་མང་པོ་ནི་འདི་འི་ནང་དུ་མ་གཐོགས༎ འུང་གྀ་འོག་དུ་འཇང་
(335) ལ་ཆབ་སྲིད་མཛད་དེ་མྱྭ་དཀར་པོ་དཔྱའ་ཕབ༎ མྱྭ་ནག་པོ་ བཀུག་པ་ལ་ །
(336) རྒྱལ་པོ་འདྀ་ལས༎ དབུ་རྨོག་བརྩན་ཞིང། ཆབ་སྲྀད་མཐའ་སྐྱེས་པ་ནྀ་སྔན་ཆད་གདུང་རབས་ཀྱིས་
(337) མ་མཛད་དོ༎
(338) ༄༅༎ རྒྱལ་པོ་ཁྲི་ལྡེ་གཙུག་བརྩན་གྱྀ་རིང་ལ༎ རྗེད་གཤྀན་ཆིས་འཇམ་སྟེ། མྱྀ་ཡོངས་ཀྱིས་སྐྱྀད་དོ༎ བློན་ཆེ་སྟག་སྒྲ་
(339) ཁོང་ལོད་དང་། རྗེ་བློན་མོལ་ནས༎ རྒྱལ་པོ་ཞབས་ཀྱྀས་བཙུགས་ཏེ༎ རྒྱ་ལ་ཆབ་སྲིད་མཛད་ན༎ རྒྱ་འི་
(340) མཁར་ཀྭ་ཅུ་ལ་སྩོགས་པ་ཕབ་སྟེ༎ དེ་ཙམ་ན་རྒྱ་འི་སྲིད་ཆེས་ནས༎ བྱང་ཕྱོགས་ཀྱི་དྲུ་གུ་ཀུན་ཀྱང་འདུས་ལ༎
(341) ཏ་ཟྀག་ལ་ཐུག་པ་མན་ཆད་རྒྱ་འྀ་ཁམས་སུ་གཐོགས་སྟེ༎ རྒྱ་འྀ་ནོར་མང་པོ་སྟོད་པྱོགས་སུ་འདོན་པ་རྣམས༎ ཀྭ་
(342) ཅུ་ན་ཚོགས་བྱས་པ་ལས༎ ཐམས་ཆད་བོད་ཀྱིས་ཕབ་སྟེ་བཞེས་པས༎ བླར་ཡང་དཀོར་མང་པོ་བརྙེས༎ འབངས་
(343) མགོ་ནག་པོས་ཀྱང། རྒྱ་དར་བཟང་པོ་ཁྱབ་པར་ཐོབ་བོ༎ ལྷོ་པྱོགས་ཀྱྀ་སྨད་ན་འཇང་དུམ་མྱྭ་དཀར་པོ་ཞེས་
(344) བྱ་བ་འི་རྒྱལ་པོ་སྡེ་མྱྀ་ཅུང་བ་ཞིག་འདུག་པ༎ རྒྱལ་པོ་ཐུགས་སྒམ་པོ་འི་རླབས་དང་ཐབས་ཀྱིས་བཀའ་སྩལ་ཏེ།
(345) མྱྭ་འྀ་རྒྱལ་པོ་ཀག་ལ་བོང་ཞེས་བྱ་བ༎ འབངས་སུ་པྱག་འཚལ་ནས། ཐབས་གཅུང་སྩལ་ཏེ། མྱི་མང་གྀ་
(346) སྣོན་བཏབ། ཡུལ་ཆེ་འྀ་ནི་འདབ་བསྐྱེད་དོ༎ འཇང་གྀ་རྒྱལ་པོ་བོད་ཀྱི་འབངས་སུ་བཞེས་པས༎ རྒྱ་འྀ་ཆབ་སྲིད་
(347) ལ་ཡང་ཤྀན་དུ་དམའ་ཞྀང། མྱྀ་བདེ་བར་བྱས་སཱོ༎ འཇང་མྱྭ་འྀ་རྒྱལ་པོ་ལྟ་ཞྀག་རྒྱ་ལ་ལྟ་ལྟ་བ་ལས༎ རྒྱ་རྗེས་
(348) དགྲར་ ༎ བཙན་པོ་ཁྲྀ་ལྡེ་བཙུག་བརྩན་གྱི་ཞ་སྔར་གློ་བ་ཉེ་ནས༎ རྒྱ་ཡུལ་ཕབ་ཀྱིས་ནྀ་ཡུལ་དང༎
(349) མཁར་དུ་བཆས་ཏེ་ཕུལ༎ གཡུལ་སྤྲད་ཀྱིས་ནྀ། རྒྱ་བཙོན་ལུག་ལྟར་བསྐྱངས་སོའ༎ འུང་ནས་བཙན་པོ་
(350) ཁྲྀ་ལྡེ་གཙུག་བརྩན་གྱི་ཞ་སྔར༎ ཕང་དང་གྀ་ཁང་མོ་ཆེར༎ ཀག་ལ་བོང་གི་བློན་པོ། དྭན་ཅུང་ཀོག།
(351) པྱག་འཚལ་བ་འྀ་ཚེ༎ བཙན་པོ་རྗེས་འབངས་ཀྱིས་མགུར་བླངས་པ་འྀ་ཚིག་ལ༎ དགུང་སྔོ་ནི་བདུན་རིམ་
(352) གྱྀ༎ ལྷ་ཡུལ་ནི་གུང་དང་ནས༎ ལྷ་སྲས་ནྀ་མྱི་འི་མགོན། མྱྀ་ཡུལ་ནྀ་ཐམས་ཆད་དང། མྱི་མཚུངས་
(353) ནྀ་མྱི་འདྲའ་སྟེ༎ ཡུལ་མཐོ་ནི་ས་གཙང་བས༎ བོད་ཡུལ་ནྀ་གཤང་དུ་གཤེགས༎ མྱྀ་ཡུལ་ནྀ་ཀུན་ཀྱི་
(354) རྒྱལ༎ ཆོས་བཟང་ནྀ་གཙུག་ཆེ་བས༎ རྒྱལ་པྲན་ནྀ་ཀུན་ཀྱང་འདུམ༎ ན་ནིང་ནྀ་གཞེ་ནིང་སྔ། ཆབ་
(355) ཆབ་ནྀ་མ་གཞུག་ནས༎ ལ་བོང་ནི་རྗེ་དང་སྐོལ། བློ་ཆེ་ནི་དཀྱེལ་མཁས་ལ༎ རྒལ་མཁས་ནི།
(356) ཁོང་དཔའ་བས༎ རྒྱ་རྗེ་ནྀ་བསམ་ལང་ལ། དགྲའ་བཞེར་ནྀ་གཡུལ་སྤྲད་ཅིང། དགྲ་ཟྀན་ནྀ་གསར་
(357) སྤངས་པས༎ སྲྀད་ཀྱི་ནི་མགོ་བཟུང་ཞྀང། ཕ་སྐྱབས་ནྀ་སྡུག་བཙལ་པའ༎ ལྷ་སྲས་ནྀ་བཙན་ལ།
(358) བཙལ༎ ལྷ་སྲས་ནྀ་གཙུག་ཆེ་ལ༎ ཆོས་བཟང་ནྀ་རྗེད་གཤིན་ཞྀང་བཀའ་དྲང་ནྀ་གསུང་རྟག་ལའ།
(359) ལ་བོང་ནྀ་སྲིད་གསོལ་ ། མྱྀ་སྲྀད་ནྀ་ལྷས་མཛད་ཀྱིས། སྲྀད་ཆེ་ནི་མཐའར་མྱི་འགྱུར། ལ་བོང་ནྀ་རྗེ་དང་
(360) སྐོལ། དཔའ་འྀ་ནི་ལས་བྱས་པའ༎ རྒྱ་མཁར་ནྀ་མཐོའ་བཤིག་ཅིང། རྒྱ་འབངས་ནྀ་མང་བསྡུས་ནས།
(361) ཡུལ་དང་ནྀ་སྡེར་ ། བོད་ཡུལ་ནི་ དུ་བགྱིས། ཡར་ཏེ་ནྀ་གནམ་ཡང་དགྱེས། མར་ཏེ་ནྀ་ས་ཡང་
(362) དགའ། ལ་བོང་ནྀ་རྗེ་དང་སྐོལ། ཇེ་ཉེ་ནྀ་ཇེ་ཉེ་འོ། ལྷ་ཉེ་ནི་གུང་དང་ཉེ། ཇེ་བརྟན་ནྀ་ཇེ་བརྟན་ན། ཤམ་པོ་ནི་གཉན་
(363) ལ་བརྟན། དྀ་རིང་ནི་སང་ལྟ་ན། ཅུང་ཀོག་ནྀ་དཔོན་དང་གཡོག། གནམ་ས་ནྀ་ཡིད་སྦྱོར་བ། ན་བུན་ནི་ལྷ་འི་
(364) སྦུབས། འགེང་གང་ནྀ་ཀུན་ལ་དཔེན༎ སྔ་བསུས་ནྀ་པྱིས་བསྐྱལ་ཞྀང། ཀླུ་བླངས་ནྀ་བྲོ་བརྡུངས་པའ། དགོས་
(365) ཀྱིས་ནྀ་རིམ་གྲོ་བགྱིའ༎
(366) ༄༅། ༔། བཙན་པོ་ཁྲི་སྲོང་ལྡེ་བརྩན་གྱྀ་རིང་ལ༎ ཆོས་བཟང་སྲྀད་ཆེ་སྟེ། རྒྱལ་པོ་ནྀ་གནམ་ས་གཉྀས་ཀྱི་བར་ཡུལ་དུ་
(367) བརྣམ་ཞྀང༎ འགྲེང་དུད་གཉིས་ཀྱྀ་རྗེ་དང་བདག་མཛད་པ་འྀ་གཙུག་ལག་ཆེན་པོ། མྱྀ་འི་དཔེར་རུང་བར་མཛད་དཱོ༎
(368) ལེགས་ཀྱི་བྱ་དགའ་ནྀ་རངས་པར་བྱིན། ཉེས་ཀྱྀ་ཆད་པ་ནྀ་དམྱིགས་སུ་ཕོག་པར་མཛད་དོ༎ འཛངས་པ་དང་དཔའ་
(369) བོ་འི་རྀ་མོ་བསྐྱེད་དོ༎ ངན་པ་མ་རབས་ནྀ་ཆིས་ཀྱིས་གསོས་སོའ༎ དེ་འྀ་ཚེ་བློན་པོ་སྲིད་བྱེད་པ་འྀ་རྣམས་ཀྱང།
(370) བློ་མཐུན་གྲོས་གཆིག་སྟེ༎ པྱྀ་འི་དགྲའ་བྱུང་བ་ལ། ཐབས་དང་ཡེ་མྱིག་ཆེར་བྱེད། ནང་གྀ་ཆོས་བྱ་བ་ལ་དྲང་ཞྀང་འགྲུས་
(371) སུ་བྱེད༎ འཕྲག་མྱྀ་དོག། ཉེས་མྱྀ་བྱེད༎ དཔའ་འཛངས་གཉྀས་ནྀ་རླག་པ་བཞིན་བཙལ་ཏེ། འཛངས་པ་དཔའ་
(372) བོ་ནི་ཆེ་ས་ཆུང་སར་བསྟོད་ནས། ས་ས་ཡུལ་ཡུལ་དུ་བཀོད་དོ༎ འབངས་འོག་མ་དལ་ཞྀང་ཡུལ་ན་འཁོད་པ་
(373) ནྀ༎ འཛངས་དྲང་གཉྀས་སློབ་བཱོ། དམག་མྱི་སོ་ལ་འཁོད་པ་ནྀ་དཔའ་བ་འྀ་ཐབས་དང། རྩལ་སློབ་བོ༎ བློ་སྒྱུ་
(374) གཉྀས་ཀྱི་རླབས་ཆེད་པོས་ཐུབ་པས༎ སྡང་དགྲའ་སྡོ་བ་ཡང་མྱེད་དོ༎ སངས་རྒྱས་ཀྱྀ་ཆོས་བླ་ན་མྱེད་པ་
(375) མཛད་ནས༎ དབུས་མཐའ་ཀུན་དུ་གཙུག་ལག་ཁང་བརྩིགས་ཏེ། ཆོས་བཙུགས་ནས། ཐམས་ཤད་ཀྱང་སྙིང་
(376) རྗེ་ལ་ཞུགས་ཤྀང་དྲན་བས་སྐྱེ་ཤི་ལས་བསྒྲལ་ཏོ། གཡུང་དྲུང་དུ་བཏོན་ཏོ༎ རྗེ་བློན་མོལ་ཏེ། ཞང་མཆིམས་
(377) རྒྱལ་ཟྀགས་ལ་སྩོགས་པས་རྒྱ་འྀ་མཁར་ཀིང་ཤྀ་ཕབ་སྟེ། རྒྱ་རྗེ་གྭང་བུ་ཧྭང་ཏེ་བསྐོས་སོ༎ ལེགས་པ་ཞིན་
(378) པ་འི་བྱ་དགའ། གཡུ་འྀ་ཡི་གེ་ཆུ་ངུ་ནམ་ནམ་ཞར་ཞར་བྱིན་ནོ༎ དབའས་སྐྱེས་བཟང་སྟག་སྣང་གིས༎
(379) རྒྱ་འྀ་དམག་པོན་ཧོན་ཛེ་སངས་དང། འགུའ་ལོག་སྒང་དུ་གཡུལ་སྤྲད་ནས། རྒྱ་མང་པོ་བཐུངས་སྟེ།
(380) འགུའ་ལོག་རྒྱ་དུར་དུ་ ༎ སྦྲང་རྒྱལ་སྒྲ་ལེག་ཟིགས་ཀྱིས། སྟོད་ཕྱོགས་སུ་ ། མུ་
(381) གཡུལ་བཟློག་ནས། ལུང་གྀ་རྒྱལ་པོ་ནུང་ཀོག་མན་ཆད་འབངས་སུ་བསྡུས། དབའས་བཙན་བཞེར་མདོ་
(382) ལོད་ལ་སྩོགས་པས། མཁར་ཚན་ཡན་ཆད་དུ་ ། མཁར་ཅུ་པ་བརྒྱད་ཕབ་ནས། དོར་པོ་བཏོན་ཏེ།
(383) འབངས་སུ་བཞེས་སོ༎ ཆབ་སྲྀད་ཆེ་སྟེ་ལོང་ཤན་ལ་རྒྱུད་ཡན་ཆད༎ པྱག་དུ་བཞེས་ནས། མཐོང་ཁྱབ་
(384) ཁྲྀ་སྡེ་ལྔ་བཙུགས། བདེ་བློན་ཁམས་ཆེད་པོ་གཆིག་གསར་དུ་བསྐྱེད་དོ༎ བློན་ཆེ་སྣང་བཞེར་ཟླ་བརྩན་
(385) འཛངས་ཤྀང་མཁས་ལ། བཀྲའ་ཤྀས་ཤིང་ཁ་དྲོ་བས། ནོར་བུ་རྀན་པོ་ཆེ་འི་ཡི་གེ་སྩལ་ཏོ༎ འབངས་
(386) ཀྱྀ་ནང་ན། དོར་ཏེ་པྱུག་ཚམས་སྟེ་འཛོམ་དཔའ་བ་འྀ་མཚན་མར། ཐོག་བུ་སྩལ་ཏོ༎ བཙན་
(387) པོ་འི་ཞ་སྔ་ནས། ཐུགས་སྒམ་བ་འྀ་རླབས་དང། དབུ་རྨོག་བརྩན་པོ་འི་བྱིན་ཀྱིས༎ ཉི་ངོག་རྒྱལ་
(388) པོ་གཞན་དཔྱའ་ཕབ་པ་དང། རྒྱལ་པྲན་འབངས་སུ་བཀུག་པ་ལ་སྩོགས་པ་ཕྱིར༎ ཆབ་སྲིད་མཐའ་
(389) བཞིར་བསྐྱེད། ནང་གྀ་བདེ་བ་ནྀ་སྙོམས་པར་མཛད་དེ༎ བོད་འབངས་ཀྱི་ནང་ནས་ཞོ་ཤ་འབུལ་འབུལ་
(390) བ་རྣམས་ཀྱང། ཡང་དག་པར་གཡུང་དྲུང་གྀ་བཀའ་དྲིན་མ་བྱིན་བ་མྱེད་དོ༎ བཙན་པོ་འདྀ་ལས་ཆབ་
(391) སྲིད་ཆེ་བ། སྔོན་ཆད་གདུང་རབས་ཀྱིས་མཛད་པ་ལ་ནྀ་མ་བྱུང་ངོ༎ རྒྱལ་པོ་འདྀ་འྀ་རིང་ལ། འབྲོ་ཁྲི་གཟུའ་
(392) རམ་ཤགས་ཀྱིས། སྟོད་པྱོགས་སུ་ ། ལྀ་འབངས་སུ་བཀུག་ནས་དཔྱའ་ཕབ་བོ༎ འུང་གྀ་འོག་
(393) དུ་མྱྭ་དཀར་པོ་འབངས་སུ་མངའ་བ་ལས། གློ་བ་རྀངས་པ་འྀ་ཚེ། དམག་ཕོན་འབྲོ་རམ་ཤགས༎
(394) བཀའ་སྩལ་ནས། བྲག་རྩེར་ནོལ་ཐབས་བཀྱེ་བ་འི་ཚེ༎ འཇང་མང་པོ་བཀུམ་ནས༎ སྤྱན་ཆེན་
(395) པོ་ཉིང་རིམ་དང། སྣ་ལ་གཐོགས་པ་དང། དམངས་ཡན་ཆད་སུམ་བརྒྱའ་རྩ་བཅུ་གཉྀས་བཟུང་ནས།
(396) འཇང་རྗེ་གོལ་གྱིས་ཀྱང་པྱག་འཚལ་ཏེ། འབངས་རྣལ་མར་བཀུག་ནས། དཔྱའ་ཕབ་སྟེ་སྔ་མཁོ་བཞིན་དུ་
(397) བཀོད་དོ༎
(398) ༄༅། ༔། རྒྱལ་འདྀ་འི་རིང་ལ༎ ཞང་ཞུང་ལྟེ་བུ༎ གཉེན་གྱྀ་ཡང་དོ༎ འཐབ་ཀྱྀ་ཡང་སྐལ་ཏེ༎ ཞང་ཞུང་བདག་དུའ།
(399) ༎ བཙན་མོ་སད་མར་ཀར༎ ལྀག་མྱི་rhya ལ་ཆབ་སྲྀད་ལ་གཤེགས་སོ༎ སྔ་ན་ཤུད་ཀེ་ཟ་རྩལ་ཐྀང་ཤགས་མཆིས་སྟེ༎ བཙན་མོ་དང་ནྀ་མྱི་