Old Tibetan Documents Online

Pt_1287/001-199

(1) ༄༅། ༔། དྲྀ་གུམ་བཙན་པོ་སྐུ་ཆུང་བ་འྀ་ཚེ་མཚན་ཇྀར་གདགས་ཤེས༎ མ་མ་གྲོ་ཞ་མ་སྐྱི་བརླིང་མ་ལ་དྲྀས་ན། མ་མ་འྀ་མཆིད་ནས།
(2) སྐྱྀ་བྲག་མར་བ་ནྀ་རྙིལ་ཏམ་མ་རྙིལ། དང་མ་འབྲི་སྤངས་ནྀ་མྱེས་ཚིག་གམ་མ་ཚྀག། མཚོ་དམ་ལེ་དབལ་མཚོ་ནི་སྐམས་
(3) སམ་མ་སྐམས་ཤེས་མཆི། བྲག་མ་རྙྀལ། མཚོ་ཡང་མ་སྐམས་སྤང་ཡང་མྱེས་མ་ཚིག་ཅེས་ ། མ་མ་གྲོ་ཞ་
(4) མ། རྒས་ནས་རྣ་ལོག་པར་ཐོས་སྟེ། བྲག་ཀྱང་རྙིལ། སྤང་ཡང་མྱེས་ཚིག། མཚོ་ཡང་སྐམས་ཤེས་ཐོས་ནས༎
(5) འོན་ཏང་ཆུ་དགུམ་སྲི་དགུམ་གྱྀས། དྲྀ་གུམ་བཙན་པོར་མཚན་ཐོག་ཤིག་ཆེས་མཆི་ནས༎ དྲྀ་གུམ་བཙན་
(6) པོར་མཚན་བཏགས་ནས། མཚན་བཏགས་ ། ཐུགས་སུ་ཡང་ཞུགས། ལྡེ་སྲས་མྱྀ་འི་མྱི་ཚུལ་ཏེ། མངོན་
(7) བར་དགུང་དུ་གཤེགས་པ་ལ་སྩོགས་པ་འཕྲུལ་དང་བྱྀན་ཆེད་པོ་མངའ་བས། དྲོད་དང་དྲེགས་མ་ཐུབ་སྟེ༎ བཙན་
(8) འདྲན་བདའ་ནས། ཡབ་འབངས་ཕ་དགུའ་དང། ཡུམ་འབངས་ཚན་གསུམ་ལ་དགྲ་རུ་རྒལ་གཡག་དུ་དྲུང་
(9) ཕོད་དམ་ཞེས་བཀའ་སྩལ་ན། སོ་སོ་ནས་ཀུན་གྱིས་མྱྀ་ཕོད་ཆེས་གསོལ་ཏོ། ལོ་ངམ་རྟ་རྫིས་ཀྱང་མྱི་ཕོད་
(10) ཅེས་གསོལ་པ་ལས་མ་གནང་སྟེ༎ འུང་ནས་ལོ་ངམ་གྱྀས་གསོལ་པ། དེ་ལྟར་མྱྀ་གནང་ན། ལྷ་འི་དཀོར་
(11) མདུང་རང་འདེབས་དང། རལ་ རང་གཅོད་དང། ཁྲབ་རང་གྱོན་དང། ཕུབ་རང་བཟུར་ལ་སྩོགས་པ། འཕྲུལ་གྱི་དཀོར་
(12) ཆེད་པོ་མངའ་བ་འྀ་རྣམས་བདག་ལ་སྩལ་ན་ཕོད་ཅེས་གསོལ་ཏོ། དེ་ནས་ལྷ་འྀ་དཀོར་ཐམ་ཤད་སྩལ་ཏོ།
(13) འུང་ནས་ལོ་ངམ་རྟ་རྫྀ་ཡང། མཁར་མྱང་རོ་ཤམ་པོར་སྔར་མཆྀས་སོ། བཙན་པོ་ཡང་མྱང་རོ་ཤམ་པོར།
(14) གཤེགས་ནས། མྱང་རོ་ཐལ་བ་ཚལ་དུ་གཡུལ་བྲེས་ནས། འུང་ནས་རྟ་རྫྀ་འི་མཆིད་ནས། དབུའ་འབྲེང་ཟང་ཡག་ཀྱང་
(15) གཆད་དུ་གསོལ། དབུའ་སྐས་སྟེན་དགུའ་ཡང་ཁ་ཐུར་དུ་བསྟན་དུ་གསོལ་ནས། དེ་རྣམ་གཉིས་ཀྱང་དེ་བཞིན་
(16) གནང་ངོ༎ འུང་ནས་ལོ་ངམ་གྱྀས་གླང་པོ་བརྒྱའ་ལ། གསེར་གྱྀ་མདུང་རྩེ་ཉིས་བརྒྱའ་ བཏགས་ཏེ། རྒྱབ་དུ་ཐལ་
(17) བ་བཀལ་ནས། གླང་ནང་འཐབ་སྟེ། ཐལ་བ་གཐོར་ནས། དེ་འྀ་ནང་དུ་ལོ་ངམ་གྱིས་བརྒལ་ཏོ། བཙན་པོ་དྲི་གུམ་ལྡེ་
(18) བླ་གུང་རྒྱལ་གྱིས་གནམ་དུ་དྲངས་ན། ལོ་ངམ་གྱྀས་མཆན་ནས་སྤྲེ་འུ་པྱུང་བས། ལྡེ་བླ་གུང་རྒྱལ་ནི་ཏི་ཙེ་གངས་
(19) རུམ་དུ་ གཤེགས་སོ༎ བཙན་པོ་དྲི་གུམ་ཡང་དེ་རུ་བཀྲོངས་ནས། སྤུར་ཟངས་བརྒྱའ་ཁ་སྤྲོད་གྱི་ནང་
(20) དུ་བཅུག་སྟེ་རྩང་ཆུ་འྀ་གཞུང་ལ་བཏང་ངོ། ཆབ་གཞུག་སེར་ ཀླུ་འོད་དེ་བེད་དེ་རིང་མོ་འྀ་ལྟོར་གཤེགས་སོ༎
(21) སྲས་གཉིས་ཀྱང་ཤ་ཁྱྀ་དང་ཉ་ཁྱྀར་ རྐོང་ཡུལ་དུ་ བཀྱེ་འོ༎ འུང་གྀ་རྗེས་ལ་rhya མོ་rhul བཞི་ཁུགས་
(22) དང། སྣ་ནམ་བཙན་བཞོང་རྒྱལ་གཉིས༎ སྲྀད་ཀྱི་ཁྱི་བོ་ཆེ་འོན་ཟུགས་ཡར་གྲགས་དང། འཇང་གྀ་ཟུ་ལེ་མ་འཇང་དང་
(23) འོན་རྐུ་གཉིས་ཀྱི་སྤུ་ལ་དུག་ ། འཕྲང་པོ་འི་བྲག་གཡའ་བོ་འདའ་ནས། ཕོ་ལ་ བལྟས་ན་ལྟས་བཟང་སྟེ་
(24) ཡུལ་མྱང་རོ་ཤམ་པོ་དྲུང་དུ་ལྷགས་ནས། ཐབས་ཀྱྀས་བསྒྱུད་དེ། ཁྱྀ་འི་སྤུ་ལ་དུག་ཡོད་པ་ད་ང་འྀ་རྟ་རྫིས་ཁྲིད་ནས།
(25) ཁྱྀ་བཟང་པོ་ལོ་ངམ་གྱི་ བྱུགས་པ་དང། ང་འྀ་རྟ་རྫྀས་ཁྱི་འྀ་སྤུ་ལ་དུག་བསྐུས་པས་ལག་པ་བྱུག་སྟེ་བསད་དེ།
(26) ཤ་བླན་ནོ༎ འུང་གྀ་འོག་དུ་བཀྲགས་ཀྱྀ་བུ་ལྷ་བུ་རུ་ལ་སྐྱེས་ཕ་ཚན་དང༎ rhya ཕ་ཚན་དུ་འཐབས་སོ། rhyas
(27) བཀྲགས་རབས་བཆད། དུད་སྣ་ཕོ་ལོ༎ བཀྲགས་ཀྱྀ་ཆུང་བ་གཆིག་བྲོས་ཏེ། ཕ་མྱིང་གྀ་ཡུལ་དུ་ཐར་ཏོ། ལྟོ་ན་བུ་ཁྱེར་ཏེ་
(28) སོང་བ་བྱུང་ངོ༎ བུ་སྤུས་ལ་འགྲེང་ནུས་ཙམ་ནས། མ་ལ་མྱྀ་གང་བྱ་གང་ལ་རྗོ་བོ་ཡོད་ན་ང་འི་རྗོ་བོ་གར་རེ། མྱི་གང་
(29) བྱ་གང་ལ། ཕ་ཡོད་ན་ང་འི་ཕ་ག་རེ་ཞེས་ཟེར་ཏོ། ང་ལ་སྟོན་ཆིག་ཅེས་མཆི་ན། མ་འྀ་མཆིད་ནས། མྱྀ་འུ་ཆུང་ཁ་
(30) མ་ཆེ་ཤིག། རྟེ་འུ་ཅུང་ཁ་མ་དྲག་ང་མྱྀ་ཤེས་ཤེས་བྱས་ན། སྤུས་ཀྱྀ་བུ་ངར་ལེ་སྐྱེས་ཀྱི་མཆིད་ནས། ང་ལ་མྱི་
(31) བསྟན་ན་ཤྀར་འགྲོ་ཞེས་བགྱིས་པ་དང། མས་ཀྱང་གདོད་བསྟན་ཏེ། ཁྱོད་ཀྱི་ཕ་ནྀ་rhyas བསད་དོ། ཁྱོད་ཀྱི་ཇོ་བོ་
(32) བཙན་པོ་ནི། ལོ་ངམ་རྟ་རྫྀས་ ། སྤུར་ནི་ཟངས་བརྒྱའ་མ་ཁ་སྤྲོད་ཀྱྀ་ནང་དུ་བཅུག་སྟེ། རྩང་པོ་འི་
(33) གཞུང་ལ་བཏང་ངོ། ཆབ་གཞུག་སེར་ཚངས་སུ། ཀླུ་འོ་དེ་རིང་མོ་འི་ལྟོར་གཤེགས་སོ༎ སྲས་མཆེད་
(34) གཉིས་ནྀ་ཤ་ཁྱི་དང་ཉ་ཁྱྀར་ ། རྐོང་ཡུལ་དུ་ བཀྱེ་འོ༎ འུང་ནས་སྤུས་ཀྱི་བུ་ངར་ལ་སྐྱེས་
(35) ཀྱི་མཆིད་ནས། ང་མྱྀ་རླགི་ནི་རྗེས་གཅོད། ཆུ་རླག་གི་ནི་དབྲེས་ཚོལ་དུ་འགྲོ་ཞེས་མཆི་ནས། སོང་ངོ།
(36) རྐོང་ཡུལ་བྲེ་སྣར་དུ་སྲས་ཤ་ཁྱྀ་ཉ་ཁྱི་དང་ཡང་མཇལ་ལོ༎ ཀླུ་འོ་དེ་བེད་དེ་རིང་མོ་དང་ཡང་མཇལ་ལོ༎ བཙན་
(37) པོ་འི་སྤུར་ཇྀ་འདོད་པས་བླུ་ཞེས་བྱས་ན། གཞན་ཇྀ་ཡང་མྱྀ་འདོད། མྱི་འྀ་མྱིག་བྱ་མྱྀག་ལྟར་འདུག་པ་འོག་ནས་འགེབས་
(38) པ་གཆིག་འདོད་ཅེས་ཟེར་ནས༎ སྤུས་ཀྱི་བུ་ངར་ལ་སྐྱེས་ཀྱིས། གནམ་མཐའ་བཞིར་བཙལ་ཀྱང་མྱི་འི་མྱིག་
(39) བྱ་མྱིག་དང་མཚུངས་འོག་ནས་འགེབས་པ་མ་རྙེད་ནས། བརྒྱགས་ཆད་ལྷམ་ ། སླར་མ་འྀ་གན་དུ་འོངས་
(40) ནས། མྱྀ་རླག་གི་ནྀ་རྗེས་ཆོད། ཆུ་ ནི་དབྲེས་ཀྱང་རྙེད་དོ། སྲས་ཤ་ཁྱི་ཉ་ཁྱྀ་དང་ཡང་མཇལད། ཀླུ་འོ་དེ་རིང་
(41) མོ་དང་ཡང་མཇལ་ན། སྤུར་གྱི་གླུད་དུ། མྱྀ་འི་མྱིག་བྱ་མྱིག་དང་མཚུངས་འོག་ནས་འགེབས་པ་གཆིག་འདོད་
(42) ཆེས་ཟེར་ན་མ་རྙེད་ཀྱྀས། ད་དུང་ཚོལ་དུ་འགྲོ་དགོས་ཀྱིས། བརྒྱགས་ཐོག་ཤིག་ཅེས་མཆི་ནས་སོང་ངོ༎
(43) གང་པར་འཕྲུན་གྱི་འོག་དུ་པྱིན་ན། ཆོ་མྱི་བྱ་འྀ་བུ་མོ་ཞིག་ཡུར་བ་བྱེད་པ་འྀ་གན་དུ་སོང་ན། བུ་ཁུ་ལྗོ་ན་
(44) འདུག་པ་ཞིག། མྱིག་བྱ་མྱིག་དང་མཚུངས་འོག་ནས་འགེབས་པ་གཆིག་འདུག་ནས། དེ་བླུ་ན་ཇི་འདོད་
(45) ཅེས་མ་ལ་དྲྀས་ན། མ་ན་རེ་གཞན་མྱྀ་འདོད། ནམ་ནམ་ཞ་ཞར། བཙན་པོ་རྗེ་དབྱལ་ཞིག་ནོངས་ན། ཐོར་ཏོ་འཕྲེན་
(46) མོ་ནི་བཅིངས། ངོ་ལ་མཚལ་གྱིས་བྱུགས། ལུས་ལ་ནི་བཞགས། བཙན་པོ་འི་སྤུར་ལ་ནྀ་འཚོག། མྱྀ་ལ་འཕྲོག་
(47) [-]om/ ཟས་ལ་ནྀ་ཟ་འཐུང། དེ་ལྟར་བྱ་འམ་མྱི་བྱ་ཞེས་མཆི་ནས། དེ་བཞིན་བགྱི་བར། མནའ་བཆད་མཐོའ་
(48) བཆད། དམ་བགྱྀས་ཚྀག་བགྱིས་ ༎ ཆོ་མྱྀ་བྱ་འྀ་བུ་མོ་ཁྲིད་དེ་སོང་ངོ༎ ཀླུ་འོ་དེ་རིང་མོ་འི་ལྟོར་སྤུར་གྱྀ་ཀླུད་དུ་
(49) བཅུག་སྟེ་བཏང་ངོ། ཉ་ལྷ་གཉྀས་ཀྱིས་བཙན་པོ་འི་སྤུར་བཟུང་ངོ། གྱང་ཏོ་བླ་འབུབས་ཀྱི་མགུར་དུ་བང་སོ་ །
(50) གཅུང་ཉ་ཁྱྀ་ནྀ་ཡབ་ཀྱི་མདད་གཏོང་ངོ། གཅེན་ཤ་ཁྱྀ་ནི་ཡབ་ཀྱྀ་སྐུ་མཚལ་གཉེར་དུ་ ། ཉ་ཁྱི་ནི་
(51) རྐོང་དཀར་པོ་ ། དམག་སུམ་སྟོང་སུམ་རྒྱ་ཞིག་དང་ ། མཁར་པྱིང་བར་ ། ཡུལ་ཡབ་
(52) ཀྱི་རྗེ་མྱི་བཞུགས་ན། པྱི་འབྲོག་གདེངས་པྱོལ་པྱོལ་གྱི་ཆ་འོ། དོག་ཡབ་ཀྱི་ཆར་མ་ ། ས་འོན་བུ་སྤུར་
(53) ཁོག་ཁོག་ཅེས་གསུངས་སོ། མེན་པ་འཕྲེང་བ་འྀ་ལ་ ། ཏིང་སྲབ་རོང་རྀངས་འདའས་སོ། བ།
(54) ཆོས་གུང་དང་དུ་གཤེགས་སོ། མྱང་རོ་ཤམ་པོར་གཤེགས་ན། ལོ་ངམ་ཕོ་བརྒྱའ་ནྀ་ཟངས་བུ་བརྒྱའ་གླད་ལ་
(55) ཕུབ་ནས་ ༎ ལོ་ངམ་མོ་བརྒྱའ་ནྀ་སླང་ང་བྲང་ལ་བཆར་ཏེ་ངོག་གོ། མྱང་རོ་ཤམ་པོ་ཕབ་བོ།
(56) འགྲེང་ནྀ་བཙོན་དུ་བཟུང༎ དུད་ནྀ་ བཆད་ནས། བ་ཆོས་གུང་དང་དུ་ ། མགུར་འདྀ་ཞེས་
(57) ། འ་བ་ཉི་ཉེ་པ་ཉིད། བྱ་རོ་རོ་ན་མདུང་གྀ་རྩེ་རང་ནིག། ཡོས་རོ་རོ་ན་ལྷམ་གྱི་གོང་ར་ནིག། བརླའ་
(58) བརྡུངས། སྤུར་བཏབ། ཝོ་དེ་མྱེད་སྤུ་དེ་མྱེད་ཆེས་གསུངས་སོ། སླར་པྱིང་བ་སྟག་རྩེར་གཤེགས་སཱོ།
(59) ཡུལ་ཡབ་ཀྱི་རྗེ་རུ་གཤེགས་སོ། ཡུལ་པྱི་འབྲོག་གདེངས་མྱི་པྱོལ་གྱི་ཆ་འོ། དོག་ཡབ་ཀྱི་ཆབ་མཆིས་
(60) ཀྱྀས། ས་འོན་བུ་སྤུར་མྱྀ་ཁོག་གྀ་ཆ་འོ། དེ་ཞེས་མགུར་ ། སྒྱེད་པོ་འོག་གཟུགས་ན། ཟངས་རྡོ་
(61) བླ་ནས་ཕབ་སྟེ། རྗེ་རུ་ ༎ བཤོས་ན་ནྀ་སྤུ་དེ་གུང་རྒྱལ། གྲོངས་ན་ནྀ་གྲང་མོ་གནམ་བསེའ།
(62) བརྩིག། འགྲེང་མགོ་ནག་གྀ་རྗེ། དུད་རྔོག་ཆགས་ཀྱི་རྐྱེན་དུ་ ༎
(63) ༄༅། ༔། བཙན་པོ་ལྡེ་པྲུ་བོ་གནམ་གཞུང་རྩན་གྱྀ་རིང་སླན་ཆད༎ བློན་ཆེ་བགྱིས་པ་འྀ་རབས་ལ༎ གནའ་ཐོག་
(64) མ་འདའར་ཀྱྀ་བུ་སྟོང་དང་རྗེས་བྱས་ཏེ༎ འཛངས་ལ་དཔའ་འོ༎ གློ་བ་ཡང་ཉེ་འོ༎ དེ་འྀ་འོག་དུ་རྔེགས།
(65) དུད་ཀྱྀ་རྗེས་བྱས་སྟེ༎ དཔའ་ལ་ ༎ དེ་འྀ་འོག་དུ་ཁུ་ལྷ་བོ་མགོ་གར་གྱིས་བྱས་ཏེ༎ དགྲ་ལ་ད་ །
(66) ཞྀང་སྙིང་ཤེས། མྱིག་རྣོ༎ དེ་འྀ་འོག་དུ་ལྷོ་ཐང་འབྲིང་ཡ་སྟེངས་ཀྱིས་བྱས་ཏེ༎ པྱི་འི་དགྲ་ཐུབ༎
(67) ནང་གྀ་ཁབ་བསོ་མཐོའ༎ དེ་འི་འོག་དུ་རྔེགས་ཐང་ཡོང་ཐང་རྗེས་ ༎ དཔའ་ཞིང་འཛངས་སོ༎
(68) དེ་འི་འོག་དུ་གནུབས་སྨོན་ཏོ་རེ་སྦུང་བརྩན་གྱིས་བྱས་ཏེ༎ སྙྀང་ཤེས་མྱིག་རྣོ༎ དེ་འྀ་འོག་དུ་མཐོན་མྱི་འབྲིང།
(69) པོ་རྒྱལ་བཙན་ནུས་བྱས་ཏེ༎ དཀུའ་ཆེད་པོ་བྱས་ནས༎ ཁོ་ན་འི་སྲིང་མོ་མཐོན་མྱྀ་ཟ་ཡར་སྟེང། དུག་བསྐུར།
(70) ཏེ་བཏང་བ་ལས༎ མོ་ན་དུག་འཐུངས་ནས༎ བཙན་ནུ་བཀུམ་བ་ ༎ དེ་འྀ་འོག་དུ་སྣ་ནམ༎
(71) [འབྲིང?]ཏོག་རྗེས་བྱས༎ དེ་འི་འོག་དུ་གནུབས་ཁྲྀ་དོ་རེ་མཐོང་པོས་བྱས༎ དེ་འྀ་འོག་དུ་གནུབས།
(72) ཁྲི་དོག་རྗེ་གཙུག་བློན་གྱིས་བྱས༎ དེ་འྀ་འོག་དུ་གནུབས་མཉེན་ཏོ་རེ་ངན་སྣང་གིས་བྱས༎ དེ་འི་འོག་
(73) དུ་ཤུད་པུ་རྒྱལ་ཏོ་རེ་ང་མྱིས་བྱས་ཏེ༎ འདྀ་ཡན་ཆད་ཀྱི་བློན་པོ་འཕྲུལ་དང་ལྡན་ཏེ། ལྟག་བརྙན་དང་འདོམ།
(74) སྟེ༎ འཛངས་ཀྱང་ཚད་མྱེད་དོ༎ མྱྀ་དེ་ལྟེ་བུ་མ་སྐྱེས་པ་ཙམ་གྱི་ཚོད་དོ༎ དེ་འི་འོག་དུ་མོང།
(75) ཁྲི་དོ་རེ་སྣང་ཚབ་ཀྱིས་ ༎ འཛངས་ཀྱི་ཚད་ནྀ། རྩང་བོད་ཀྱི་ཇོ་བོ་མར་མུན་བརླགས་[ཏེ?]།
(76) དཀུའ་ཆེད་པོ་བློད་པ་འྀ་ཚེ༎ དེང་ཕོ་ཉ་ཞྀག་རིངས་པར་འོང་བ་སྙམ་གིས༎ ཕོ་ཉ་འི་ལན་མྱུར་དུ།
(77) བགྱི་འཚལ་ཞེས་མཆི་ནས༎ ཕོ་ཉ་འྀ་ལན་ཇི་ལ་མ་རག་པར་བྱས་པ་ལས༎ འུང་གྀ་རྗེས་ལའ༎
(78) ཕོ་ཉ་མཆིས་ནས༎ བྱ་མྱི་དགོས་པར༎ སྔར་སུག་ལས་བགྱིས་ ༎ འུང་ཙམ་མོ༎
(79) དེ་འི་འོག་དུ༎ མགར་ཁྲི་སྒྲ་འཛྀ་རྨུན་གྱིས་ ༎ འཛངས་རྒྱ་དང་ལྟག་བརྙན་ནྀ༎ འདྲོན་པོ་མྱི།
(80) གསུམ་འགྲོགས་ཏེ་འགྲོ་ན༎ འདྲོན་པོ་ཐོག་མ་འི་སྙིང་ལ་འདྀ་སེམས༎ བར་མ་འི་སྙིང་ལ་འདྀ༎
(81) སེམས། ཐ་མ་འྀ་སྙིང་ལ་འདྀ་སེམས་ཤེས༎ གྲོགས་པོ་ལ་གཏམ་བྱས་པ་དང༎ བདེན་ནམ་བརྫུན།
(82) འདྲོན་པོ་གསུམ་ཁ་ རྨས་ན༎ ཁྲྀ་སྒྲ་འཛྀ་རྨུན་མཆི་བ་བཞིན་མད་དེ༎ འཛངས་ཀྱང༎
(83) ནྀ་དེ་ཙམ་མོ༎ དེ་འྀ་འོག་དུ་མྱང་མང་པོ་རྗེ་ཞང་སྣང་གིས་བྱས་སོ༎ བཙན་པོ་ཡབ་ཁྲི་སློན་བཙན༎
(84) དགུང་དུ་གཤེགས༎ སྲས་ཁྲྀ་སྲོང་བརྩན་གྱི་རིང་ལ༎ མྱང་མང་པོ་རྗེ་ཞང་སྣང་གྀས༎ སུམ་ཁམས་
(85) ཐམས་ཤད་འབངས་སུ་དགུག་པར་བཀའ་སྩོལ་ཏོ༎ མྱང་མང་པོ་རྗེ་ཞང་སྣང་གྀས༎ འཛངས་ཀྱི་
(86) བློ་སྒྱུ་གཉྀས་ཀྱིས༎ མྱྀ་རྟ་གཉིས་ཚེགས་མ་བྱུང་བར༎ དཔྱའ་ཕབ་ལུག་རྟུག་གི་སྒྱུ༎ ལྕེ་ཐོར་ཏོ་
(87) ལ་བརྗོད་དེ༎ འབངས་གཉུག་མ་བཞིན་དུ་བཀུག་སྟེ་འུང་ཙམ་མོ༎ དེ་འི་འོག་དུ་མགར་མང་
(88) ཞམ་སུམ་སྣང་གྀས་བྱས་སོ༎ མང་ཞམ་སུམ་སྣང་དང། ཁུ་ཁྲི་སྙ་དགྲུའ་ཟུང་གཉིས༎ རལ་ དང་བརྡའ་
(89) པྲད་ཆེས་བགྱིས་ཏེ༎ གནའ་བཙན་པོ་འབྲོ་མཉེན་གྱི་རིང་ལ༎ མཐོན་མྱི་འབྲིང་པོ་རྒྱལ་བཙན་
(90) ནུས་བློན་ཆེ་བགྱིས་པ་ན་ཡང༎ གློ་བ་རྀངས་པར༎ མགར་མང་ཞམ་སུམ་སྣང་རལ་ དང།
(91) བརྡའ་པྲད་དེ་ཚོར་བ་སྐད་དུ་བགྱིས་ནས༎ བཟུང་སྟེ་བཀྱོན་ཕབ་པ་ན་ཡང༎ གཤེད་མ་མང་ཞམ་སུཾ༎
(92) སྣང་གིས་བགྱྀས་ཏེ༎ བཀུཾ་ནས༎ མགོ་བཆད་པ་ཐོག་ཆེས་བླངས་ཏེ༎ སྣམ་པྲག་དུ་བཅུག་ནས༎
(93) གོམ་པ་ལྔ་དྲུག་ཙམ་བོར་བ་དང་འགྱེལ་བ་སྐད་བྱ་འོ༎ དེ་འྀ་འོག་དུ་ཁྱུང་པོ་སྤུང་སད་ཟུ་ཙེས།
(94) བྱས་པ་ལས༎ འོ་མ་ལྡེ་ལོད་བཙན་དང་རེགས་མ་མཇལ་ནས༎ མཁར་ཁྲི་བོམས་སུ་མཆྀས་ཏེ༎ ཁྲི་བོམས་
(95) དཀུའ་གང་པུབ་ནས། བཙན་པོ་སྲོང་བརྩན་སྟོན་མོ་གསོལ་བར་བྱས་ཏེ༎ གློ་བ་རིངས་པ། མགར་ཡུལ་ཟུང་
(96) གྀས་ཚོར་ནས། རང་གྀ་མགོ་བཆད་དེ་གུམ་མོ༎ སྤུང་སད་ཟུ་ཙེ་འཛངས་ཀྱད་ཀྱི་ཚད་ནི༎ རྩྀས་གྲ་གསུམ་
(97) ཞལ་ཅེ་གྲ་བཞྀ་ཡང་རྣ་བས་ཉན་ཞིང་གཆོད། མྱིག་མངས་གྲ་ཆིག་ཀྱང་ རྩེ་ན། རྒྱལ༎ བྱ་པུག་རོན་
(98) ཁྱུ་གཆིག་ནམ་ཀ་ལ་ བ་ཡང། གཆིག་གཉྀས་གསུམ་བཞི་ལྔ་དྲུག་ཆེས་ ། བྱ་པྱིར་འཕུར་
(99) བ་ཡང་བགྲངས་པ་ལས༎ བྱ་ཆིག་མ་ཚང་ན༎ ཁྲས་བསད་པ་འདྲའས་ལྟོས་ཤེས་མཆི་ནས༎ མྱི་
(100) ཡོངས་ཀྱིས་བལྟས་པ་ལས༎ བྱ་ཆིག་ཁྲས་བཀུམ་སྟེ༎ སྤུང་སད་ཟུ་ཙེ་ལྟེ་བུ། ཚོར་སྐྱེན་ལ་དཀུའ་ཆེ༎
(101) སྙིང་འཛངས༎ མྱྀ་ཆིག་ལ་ཚོགས་དགུ་ཚོགས་ན༎ ཟུ་ཙེ་ལྟེ་བུ་སུ་ག་ལ་ཡང་མྱེད་དོ༎ དེ་འི་འོག་དུ་
(102) མགར་སྟོང་རྩན་ཡུལ་ཟུང་གྀས་བྱས་སོ༎ ཡུལ་ཟུང་རྒས་ནས༎ འོ་མ་ལྡེ་ལོད་བཙན་བཅུག་གོའ༎
(103) རྀང་པོ་མ་རག་པར་གློ་བ་རིངས་ནས་བཀུཾ་མོ༎ འུང་ནས་བློན་སྟོང་རྩན་སླར་བཅུག་སྟེ། ལོ་དྲུག་བགྱིས།
(104) ནས༎ རྒས་ཏེ་གུཾ་མོ༎ སྐྱིན་བར་ཞང་ལོན་པྲ་མོ་དང་འབངས་ཀྱིས་དཔྱའད་པ་ནྀ༎ དབའས་སུམ་སྣང།
(105) བཅུག་ཀྲང་ཞེས་དཔྱད་དོ༎ རྗེ་བློན་གསངས་སྟེ་བཀའ་བཏགས་པ་ནྀ༎ མགར་བཙན་སྙ་ལྡོམ་བུ་རྟ་དང།
(106) མཚུངས་རྀགས་ཀྱིས་བློན་ཆེར་བཅུག་གོ༎ བློན་ཆེ་འྀ་ལུགས་སློབ་པ་འི་འོག་པོན། དབའས་སུམ་
(107) སྣང་གིས་བྱས་ཏེ། སུམ་སྣང་གུམ་ནས༎ བློན་བཙན་སྙ་ལྡོམ་བུས་བྱས་སཱོ༎ དེ་འྀ་འོག་དུ་ཁུ་མང་པོ་
(108) རྗེ་ལྷ་ཟུང་གྀས་བྱས་སོ༎ ལྷ་ཟུང་བཀྱོན་ཕབ་ནས༎ དབའས་ཁྲྀ་གཟིགས་ཞང་ཉེན་གྱིས་བྱས་སོའ༎
(109) དེ་ནས་མགར་ཁྲྀ་འབྲིང་བཙན་བྲོད་ཀྱིས་བྱས་སོ༎ དེ་འི་འོག་དུ་དབའས་ཁྲི་སུམ་རྗེ་རྩང་བཞེར་གྱིས།
(110) བྱས་སོའ༎ དེ་འི་འོག་དུ་རྔེགས་མང་ཞམ་སྟག་ཚབ་གྱིས་བྱས་སོ༎ དེ་འི་འོག་དུ་དབའས་སྟག་
(111) སྒྲ་ཁོང་ལོད་ཀྱིས་བྱས་ཏེ༎ བཀྱོན་ཕབ་ནས༎ འབྲོ་ཅུང་བཟང་འོར་མང་གིས་བྱས་སོ༎ དེ་འི་འོག་
(112) དུ་འབལ་སྐྱེ་ཟང་ལྡོང་ཚབ་ཀྱིས་བྱས་སོ། སྐྱེ་ཟང་ལྡོང་ཚབ་བཀྱོན་ཕབ་ནས༎ དབའས་སྣང་བཞེར་
(113) ཟླ་བརྩན་གྱིས་ ༎ དེ་འི་འོག་དུ་མགོས་ཁྲི་བཟང་ཡབ་ལག་གྀས་བྱས་སོ༎ དེ་འི་འོག་དུ།
(114) མཆིམས་ཞང་རྒྱལ་ཟྀགས་ཤུ་ཏེང་གྀས་བྱས་སོ༎ དེ་ནས་ངན་ལམ་སྟག་སྒྲ་ཀླུ་གོང་གིས་ ༎
(115) དེ་འི་འོག་དུ་སྣ་ནམ་ཞང་རྒྱལ་ཚན་ལྷ་སྣང་གིས་བྱས་སོ༎ དེ་འི་འོག་དུ་འབྲོ་ཁྲི་གཟུ་རམ་
(116) ཀྱིས་ ༎ དེ་འི་འོག་དུ་དབའ་མང་རྗེ་ལྷ་ལོད་ཀྱིས་བྱས་སོ༎ དེ་འི་འོག་དུ་འབྲོ་ཁྲི་སུམ་རྗེ་སྟག་
(117) སྣང་གྀས་བྱས་སོ༎ དེ་འི་འོག་དུ་དབའས་རྒྱལ་ཏོ་རེ་སྟག་སྙས་བྱས་སོའ༎
(118) ༄༅། ༔། མཁར་པྱྀང་བ་སྟག་རྩེ་ན་ནྀ་རྒྱལ་སྟག་བུ་སྙ་གཟྀགས་བཞུགས༎ ཉེན་ཀར་རྙིང་པ་ནྀ་ཟིང་པོ་རྗེ་སྟག་སྐྱ་བོ་མཆིས༎
(119) སྡུར་བ་འྀ་ཡུ་སྣ་ན་ནི༎ ཟྀང་པོ་རྗེ་ཁྲི་པངས་སུམ་མཆིས༎ འུང་ནས་ཟྀང་པོ་རྗེ་སྟག་སྐྱ་བོ་ལྟ་ཞིག༎ ཇྀ་ལ་ཡང་
(120) ལོག་པ་གཤྀན་པྱོགས་ཤེ་དག་བྱེད་དེ༎ ཉེས་པ་ནྀ་ལེགས་པར་བཅུག། ལེགས་པ་ནི་ཉེས་པར་བཅུག་གོ༎
(121) པ་སྙྀང་ཉེ་བ༎ ལེགས་པ་འི་སྲིད་བྱས་བློ་བསྟན་པ་ནྀ་མྱི་ཉན༎ མྱྀ་གཅམ་བུ་ ངོ་ཟ་རི་བྱེད་པ་འྀ་ཚིག་ནི༎
(122) ཆེད་དུ་ཡང་ཉན་ཏོ༎ མྱྀ་འདྀ་ལྟེ་བུ་འི་ཡུས་བྱུང་ངོ༎ མྱྀ་འཛངས་པ་དྲང་མཁྲང་བྱེད་པ་དང༎ དཔའ་བོ་ཆུ་གང་བྱེད་པ།
(123) ལ་སྡང་སྟེ། རྀ་མོ་བསྐྱུངས༎ མ་འོས་པ་འྀ་ཆད་པ་ནྀ་ནན་ཆེ་འོ༎ མྱི་མཁོའ་བ་འྀ་ལས་ཀྱི་སྣ་གྲངས་ནྀ་མངས་སོ༎
(124) འུང་ལྟར་ཟྀང་པོ་རྗེ་སྟག་སྐྱ་བོ༎ ཆོས་ལོག་ཆིང་སྲྀད་གྱུར་པས༎ རྗོ་བོ་ཉེས་དགུའ་བྱེད་པའ༎ མྱྀག་གིས༎
(125) མཐོང་ཡང༎ ཉེས་པ་འྀ་བློ་གདབ་དུ་མ་འོས་པ་འྀ་ཆད་པ་ནན་ཆེས། ཚིག་དྲག་གྀས༎ ཇྀ་ག་སུས་ཀྱང་བློ་གདབ།
(126) མ་ཕོད་དོ༎ རྗོ་བོ་ནི་བླ་ན་གཐུམ་མོ༎ ཁོལ་པོ་ནྀ་འོག་ན་སྐྲག་གོ༎ རྗོ་བོ་ནི་བླ་ན་སྨྱོ། ཁོལ་པོ་ནི་འོག༎
(127) ན་གྲམ་མོ༎ གཆྀག་ལ་གཆིག་སྙིང་མྱྀ་བརྟན་ཏེ༎ ཐ་དད་དུ་སེམས་སོ༎ ཇོ་བོ་ཟིང་པོ་རྗེ་ངན་ཞན་ཏེ༎
(128) ཇྀ་ལ་ཡང་ལོག་པ་གཤྀན་པྱོགས་ཉེས་དགུར་བྱེད་པས༎ ཡུལ་གྱི་སྲིད་ཀྱང་དམའས་སོ༎ མྱྀ་ཡོངས་ཀྱང་རྗོ་བོ།
(129) ལ་འཁང་ངོ༎ འུང་ནས་ཟིང་པོ་རྗེ་སྟག་སྐྱ་བོ་འི་བློན་པོ༎ མཉན་འཛྀ་ཟུང་ནག་པོས༎ རྗོ་བོ་ལ་གསོལ་ ༎
(130) རྗོ་བོ་ཇི་ལ་ཡང་ལོག་པ་གཤྀན་པྱོགས་མཛད་པས༎ སྐོལ་ཀྱྀ་སྲིད་ནྀ་སྲིད་དུ་མ་རུང། ཆོས་ནྀ་ཆོས་སུ་
(131) མ་རུང་སྟེ། ཡུལ་གྱྀ་མྱི་དབུལ། ཉམས་ཀྱྀ་སྲིད་དམའ་སྟེ། ན་མོ་བརླག་ཟིན་ན་ཇྀ་ནོངས་ཤེས་གསོལ་ནས།
(132) འུང་ནས། ཟྀང་པོ་རྗེ་སྟག་སྐྱ་བོ་ཉན་དུ་མ་རུང་སྟེ༎ འདྀ་སྐད་ཟེར་བ་ཉེས་སོ་ཞེས༎ འཛྀ་ཟུང་བློན་པོ་ལས།
(133) པྱུང་ངོ༎ འུང་ནས་འཛྀ་ཟུང་མ་རངས་སྟེ༎ ཟྀང་པོ་རྗེ་ཁྲི་པང་སུམ་ལ་ལྟས་ནས༎ ནག་པོ་ །
(134) སྐྱ་བོ་བསད། དྲེ་འུ་རྒལ་ཏེ་བསེའ་སྒ་བཆག་གོ༎ སྟག་སྐྱ་བོ་འི་ཡུལ། ཡུལ་ཡེལ་རབ་སྡེ་བཞི་ ༎
(135) ཀླུམ་ཡ་གསུམ༎ ཟྀང་པོ་རྗེ་ཁྲི་པང་སུམ་གྱྀས། འདུས་སོའ༎ དེ་འྀ་དཀུའ་འགེལ་དུ་མཁར་
(136) སྡུར་བས་བཆད་དེ། ཀླུམ་ཡ་སུམ་གྱི་སྨད༎ མཉན་འཛྀ་ཟུང་གི་བྲན་དུ་དངར་ཏོ༎ བྲན་གྱི་ས་
(137) རྀས་ཀྱི་ནང་དུ༎ མྱང་ནམ་ཏོ་རེ་ཁྲུ་གྲུ་དང། སྨོན་ཏོ་རེ་ཙེང་སྐུ་སྤད་ཀྱང༎ འཛྀ་ཟུང་གྀ་བྲན་དུ་བཆད་དོ༎
(138) འུང་ནས། འཛྀ་ཟུང་གི་ཆུང་མ་པ་ཙབ་ཟས། མྱང་བྲན་བྱེད་པ་ལ༎ དྲེགས་བཀུར་ཏེ༎ སྡྀག་བསྣོལ། སྟུ་བསྟན།
(139) ནས། མྱང་ཙེང་སྐུ་མ་རངས་ཏེ༎ ཟྀང་པོ་རྗེ་ཁྲི་པང་སུམ་ལ༎ མཉན་གྱྀ་བྲན་བྱེད་མྱི་ཕོད་ཆེས་འཁངས།
(140) སྟེ་ ༎ ཟྀང་པོ་རྗེ་ན་རེ༎ མཉན་འཛྀ་ཟུང་ལས་ང་ལ་སྙིང་ཉེ་མྱེད་པ་འྀ་བྲན་དུ༎ ཁྱོན་འདའ་མ་
(141) རན་ལ་མྱེད་དོ༎ རྗོ་མོས་སྡིག་བསྣོལ་སྟུ་བསྟན་བ་བས༎ ཁར་གླན་ཡང་རྗོ་མོ་དབང་གིས། ཉེས་པ་
(142) མྱེད་དོ་ཞེས་བསྒོ་སྟེ། གསོལ་བ་མ་གནང་ངོ༎ འུང་གྀ་ཚིག་དེས་ཙེང་སྐུ་ཤིན་དུ་མ་རངས་སྟེ་ཡི་ཆད་དོའ༎
(143) འུང་གྀ་རྗེས་ལ༎ ཟྀང་པོ་རྗེ་འི་མངན་དབའས་བཤོས་ཏོ་རེ་ཁྲུ་གུ་དང༎ གཤེན་ཁྲི་བཞེར་འདྲོན་ཀོང་གཉིས།
(144) འཕྲེན་བ་འྀ་རྫིང་ཀར་འཐབས་ནས༎ གཤེན་ཀྱིས་དབའས་བསད་དོ༎ དབའས་ཀྱྀ་ཕོ་བོ་ཕངས་ཏོ་རེ་དབྱི་ཚབ་ཀྱིས།
(145) ཟྀང་པོ་རྗེ་ལ། ནུ་བོ་གཤེན་ཀྱིས་བསད་པ་འྀ་སྟོང་ཇི་གནང་ཞེས་གསོལ་ནས༎ ཟྀང་པོ་རྗེས༎ གཤེན་ཁྲི་བཞེར།
(146) ཁོལ་ཚབ་ནང་བློན་བྱེད་པའྀ་ངོ་མ་ཆོད་དེ༎ དགེ་བས་མྱི་དགེ་བ་བསད་ན། བསད་དུ་ཟད་དོ་ཞེས་བསྒོ་འོ༎
(147) འུང་གྀ་ཚིག་དེས༎ དབྱྀ་ཚབ་ཤིན་དུ་མ་རངས་སྟེ་ཡི་ཆད་དོ༎ འུང་ནས་མྱང་དབའས་ ཡི་ཆད་དེ། འགྲོགས།
(148) སྟེ་དོང་ངོ༎ དབྱྀ་ཚབ་ནི་སྔ། ཙེང་སྐུ་ནྀ་འཔྱི་སྟེ༎ ཁྱིམ་དུ་དོང་ངོ༎ ཙེང་སྐུ་གཆིག་པུ་པྱི་ན་ཚུར་སྨྲ་སྟེ། ཆབ་ཆབ་
(149) ནྀ་ཕ་རོལ་ན། ཡར་ཆབ་ནྀ་ཕ་རོལ་ན༎ མྱྀ་འི་ནི་མྱྀ་བུ་སྟེ། ལྷ་འྀ་ནི་སྲས་པོ་བཞུགས༎ རྗེ་བདེན་ནི་བཀོལ།
(150) དུ་དགའ། སྒ་བདེན་གྱིས་ནྀ་བསྟད་དུ་དགའ་ཞེས་སྙིང་ལ་སེམས་པ་ཁར་ཏོར་ཆེས་བྱུང་ནས༎ དབྱི་ཚབ་སྔུན་
(151) ན་འགྲོ་བ་འྀ་རྣ་བར་ལྷངས་ཤེས་ཐོས་སྟེ༎ དབྱི་ཚབ་ཀྱིས་ཚྀག་དེ་ཏོག་ཅེས་བླངས་ནས༎ ཙེང་སྐུ་ཁྱོད་
(152) ཟེར་བ་ལས་བདེན་བ་མྱེད་དོ༎ ཁོ་བོ་ཡང་འདྀ་ལས་མ་རངས་པ་མྱེད་ཀྱིས༎ ཁྱོད་སེམས་པ་དང་མྱི་འདྲའ་
(153) རེ་ཞེས་མནའ་བོར་རོ༎ འུང་ནས། མྱང་དབའས་གཉྀས་ཟིང་པོ་རྗེ་ལས་འཁུས་ཏེ༎ བཙན་པོ་སྤུ་རྒྱལ་
(154) ལ་གློ་བ་ཉེ་བར་བྱས་ནས། མནའ་མཐོའ་ཡང་ཆེར་བཆད་དོ༎ འུང་གྀ་འོག་དུ་དབའས་དབྱི་ཚབ་ཀྱིས༎ ཞང་
(155) པོ་མནོན་བཟང་ཏོ་རེ་སྲོན། བློ་ལ་བཏགས་ཏེ༎ མནའ་མཐོ་བཆད་པ་ལས༎ བཟང་ཏོ་རེ་ཤི་ནས༎ བུ་པང་
(156) སུམ་འདྲོན་པོ༎ ཟྀང་པོ་རྗེ་འི་ནང་ཀོར་བྱེད་པ་བློ་ལ་ མནའ་མཐོའ་བཆད་དོ༎ མྱང་སྨོན་ཏོ་རེས།
(157) ཚེས་པོང་ནག་སེང་བློ་ལ་བཏགས་ཏེ། མནའ་མཐོ་བཆད་དོ༎ འུང་ནས་མྱང་དབའས་མནོན་དང་གསུཾ་གྱིས།
(158) ཚེས་པོང་ནག་སེང་ལས་པྲིན་ཀྱྀས༎ སྤུ་རྒྱལ་སྟག་བུ་འྀ་སྙན་དུ་བོན་ནས༎ བཙན་པོ་འི་ཞལ་ནས། ང་འི་སྲིང་
(159) མོ་ཞིག་ཀྱང། ཟྀང་པོ་རྗེ་འི་ག་ན་འདུག་མོད་ཀྱི༎ ཁྱེད་ཟེར་བ་བཞིན་བྱ་འོ་ཞེས་བཀའ་སྩལ་ནས༎ མྱང་
(160) དབའས་མནོན་དང་གསུམ༎ བྲོ་ལེན་ཆིང་མཁར་པྱིང་བར་མཆྀས་ནས༎ ཉིན་ཞིང་ནྀ་ཕག་ཚལ་གྱི་ཤིང་
(161) ཁུང་ན་ ༎ མཚན་ཞིང་ནྀ་པྱིང་བར་མཆི་སྟེ༎ དབུ་སྙུང་བྲོ་མནའ་གཅོད་པ་འི་ཚེ༎ ཡར་མྱྀ་འབངས་
(162) ཀྱིས་དཔྱད་པའ༎ མྱྀ་བཟངས་ནྀ་རྟ་བཟངས་ཤིག༎ ཉྀན་ཞིང་ནྀ་ཕག་ཚལ་ན། མཚན་ཞིང་ནྀ་པྱིང་
(163) བར་མཆྀའ། དགྲའ་འམ་ནྀ་ཟིན་ཅི་འུ་ཞེས་དཔྱད་དོ༎ འུང་གྀ་རྗེས་ལ། ཟྀང་པོ་རྗེ་ལ་དྲ་མ་མ་དྲངས་ །
(164) རྒྱལ་སྟག་བུ་དགུང་དུ་ ༎ གདོད་མ་རྒྱལ་སྟག་བུ་འི་སྙན་དུ་ནྀ། པྲིན་ཚེས་པོང་ནག་སེང་གིས།
(165) བགྱིས་སོ༎ དེ་ཚུན་ཆད་ནྀ་ཚེས་པོང་ནག་སེང་གི་བྲན༎ སྤུག་གྱིམ་ཏང་རྨང་བུས་བགྱིས་སོ༎ གྱིམ་
(166) ཏང་རྨང་བུ་བློ་ལ་བཏགས་ན། གཉྀད་ལོག་པ་ན་བརྡོལ་གྱིས་དོགས་ནས༎ ཁྱོ་མོ་དང་མྱྀ་ཉལ་བར་རི་ལ་
(167) ཉལ་ཞིང། ནུབ་རེ་མལ་རེ་འཕོའ་འོ༎ ཁྱོ་ ཡང་[ངལ(/ང་ལ)]མཚར་གྱི་ཡྀ་དགས་ཤིག་བབ་ཀྱིས༎ གསང་
(168) ཐུབ་པར་གྱི་ཤིག་ཆེས་ ། འུང་ནས་ཇྀ་ཞིག་བྱེད་བྱེད་ནས༎ ཁྱོ་མོ་དང་གཉྀག་ཀ་ ། འུང་ནས་
(169) ཁྱོ་མོ་ན་རེ༎ ཁྱོད་ལྟོ་བོ་ཆེ་ལ། ཡྀ་དགས་མ་བབ་ཀྱི༎ ལྟོ་སྦྱོར་དུ་ངེས་སོ་ཞེས་བྱས་སོ། འུང་ནས་དེ་འི་
(170) ནུབ་མོ་ནས་མོད་ལ་ངོ་བྱས་སྟེ། མཛའ་ནས། ནུབ་གཉིས་སུམ་ལྷན་ཆིག་ཉལ་བ་ལྟར་བྱས་སྟེ༎
(171) ཁྱོ་མོ་འི་ལྕེ་སོས་བཏབ་སྟེ༎ དམུར་དམུར་ཏེ་བཆད་ནས༎ ཁྱོ་མོ་ཡང་ཤི་འོ༎ འུང་གི་འོག་དུ་
(172) ཟིང་པོ་རྗེ་ལ་མ་དྲངས་པར༎ གྱིམ་ཏང་རྨང་བུ་ནད་ཀྱིས་བཏབ་སྟེ་རབས་ཆད་དེ་ཤི་འོ༎
(173) ༄༅༎ ། བཙན་པོ་སློན་མཚན་དང། སློན་ཀོལ་མཆེད་གཉྀས་ཀྱིས༎ མྱང་ སྐུ་དང། དབའས་དབྱྀ་ཚབ་དང། དབའས་མྱེས།
(174) སྣང་དང། དབའས་པུ་ཚབ་དང། མནོན་འདྲོན་པོ་དང། ཚེས་པོང་ནག་སེང་དྲུག༎ བྲོ་སྩལ་པ་འྀ་ཚིག་ནྀ༎ དེང་ཕན་ཆད། ཟིང་
(175) པོ་རྗེ་རྒྱབ་དུ་མྱྀ་དོར་རེ། སྤུ་རྒྱལ་པང་དུ་མྱྀ་ལེན་རེ༎ བཙན་པོ་སྤུ་རྒྱལ་ལ་གློ་བ་འདྲྀང་རེ༎ མཐང་གྲང་རེ། མན་ངག་ཐུབ་པར་མྱི་
(176) འཚལ་རེ། པྱྀ་མ་ནང་འཚལ་རེ། སོམ་ཉི་བགྱྀད་རེ༎ བརྟུལ་ཕོད་པར་མྱྀ་འཚལ་རེ༎ སྲོག་སྤོངས་འཚལ་རེ༎ བཙན་པོ་
(177) སློན་བཙན་གྱིས༎ བཀའ་ཇྀ་སྩལད་པ་བཞྀན་མྱི་ཉན་རེ། གཞན་སུས་བསླུས་ཀྱང་ཉན་རེ་བར་བྲོ་སྩོལ་ཏོ༎ མྱང་
(178) ཙེང་ཅུང་དང། མྱང་མུ་གསེང་དང། ཚེས་པོང་ན་གུ་དང། དབའས་མྱེས་སྣང། དབའས་པུ་ཚབ་རྣམས་བྲོ་ལ་ ༎
(179) དེ་ནས་དགུང་ཐུས་བགོས་སྟེ། སླར་མཆིས་སོ༎ གཅུང་སློན་ཀོལ་དང། ཡུམ་སྟོང་ཙུན་གཉྀས་ནྀ། སླད་ན་ཡུལ་འཚོའ༎
(180) ཞྀང་བཞུགས་སོ༎ བཙན་པོ་ཁྲི་སློན་བཙན་གྱིས། ཞབས་ཀྱྀས་བཙུགས་ཏེ། དམག་ཁྲྀ་དང་ དྲངས་སོ༎ མྱང་ཙེང་སྐུ༎
(181) དང། མནོན་འདྲོན་པོ་གཉིས་ནྀ༎ སྟག་པ་ཤ་རུ་ལ་ཚུན་ཆད། བྱ་གཆོད་ཆིང་ཉན་རྣར་བཀྱེའོ༎ དབའས་དབྱྀ་ཚབ་དང༎
(182) ཚེས་པོང་ནག་སེང་གཉིས་ནྀ། བཙན་པོ་འི་སྤྱན་འདྲེན་ནོ༎ ཆུ་བོ་ནི་རབ་དུ་བཏོད་དོ། དྲ་ལ་ནྀ་དབྱེ་རུ་བཏྀང་ངོ། མཁར་ཡུ་
(183) སྣ་ནྀ་ཕབ་བོ༎ དགུ་གྲྀ་ཟིང་པོ་རྗེ་ནྀ་བརླག་གོ༎ མང་པོ་རྗེ་སུམ་བུ་ནྀ་དྲུ་གུ་ཡུལ་དུ་བྲོས་སོ། ཡུང་བ་སྣ་མན་ཆད༎
(184) རྐོང་བྲེ་སྣར་ཡན་ཆད། བཙན་པོ་པྱག་དུ་བོན་ཏོ༎ བཙན་པོ་ཁྲི་སློན་བཙན་གྱྀས། བཀའ་སྩལ་ཏེ། ཡུལ་ངས་པོ་ལས༎
(185) འཕན་ཡུལ་དུ་མྱྀང་སྤོས་སོ༎ མྱང་དབའས་ཀྱིས༎ མཆྀད་བླངས་པ༎ གཟུས་ནྀ་ལྷ་བོན་ཏོ། སློན་མཚན་སློན་ཀོལ།
(186) གཟུས་ནྀ་ལྷ་བོན་ཏོ༎ པྲིན་བྱ་རྒོད་ཀྱིས་ ༎ ཚེས་པོང་ནག་སེང་གིས་བཏགས་སོ། རྗེ་བདེན་གྱྀས་ནྀ་བཀོལ་ཏོ།
(187) སྒ་བདེན་གྱྀས་ནི་བསྟད་དོ༎ མྱྀ་སྨོན་རུམ་དུ་བྱུང་ངོ༎ མཚེ་གཟུགས་རུམ་དུ་འཁྲུངས་སོ༎ དེ་ནས་ཡུལ་ངས་པོ་འི།
(188) འབངས༎ དབའས་དབྱྀ་ཚབ་ལ་སྩོགས་པས༎ བཙན་པོ་འི་མཚན་གསོལ་པ༎ ཆབ་སྲིད་གནམ་བས་མཐོ༎
(189) དབུ་རྨོག་རི་བས་བརྩན་ཏེ༎ གནམ་རྀ་སློན་མཚན་དུ་ ༎ མྱང་དབའས་མནོན་དང་གསུམ་གྱིས༎
(190) ཟྀང་པོ་རྗེ་འྀ་སྲིད༎ བཙན་པོ་སྤུ་རྒྱལ་གྱི་པྱག་དུ་དངར་ཏོ༎ དེ་ནས་གནམ་རི་སློན་མཚན་གྱྀས་པྱག་ལྕག་གིས༎
(191) དྲས་ཏེ༎ མྱང་ཙེང་སྐུ་འྀ་བྱ་དགའར༎ མཉན་འཛྀ་ཟུང་གི་མཁར་སྡུར་བ་དང། བྲན་ཁྱྀམ་སྟོང་ལྔ་བརྒྱའ་ །
(192) དབའས་དབྱི་ཚབ་ཀྱྀ་བྱ་དགའར༎ ཟ་གད་གཤེན་ཀྱི་ཡུལ་ས་དང། མལ་ཏྲོ་པྱོགས་ནས་བྲན་ཁྱྀམ་སྟོང་ལྔ་བརྒྱའ་སྩལ་ཏོ༎ མནོན་འདྲོན་
(193) པོའི་བྱ་དགའར། ཁོ་ན་འྀ་པུ་ནུ་པོ་མནོན་ལ་སྩོགས་པ་བྲན་ཁྱྀམ་སྟོང་ལྔ་བརྒྱའ་སྩལ་ཏོ༎ ཚེས་པོང་ནག་སེང་གྀ་བྱ་དགའར།
(194) འོན་ཀྱྀ་སྨོན་མཁར་ནས༎ བྲན་ཁྱིམ་སུམ་བརྒྱའ་སྩལ་ཏོ༎ མྱང་ཙེང་ཅུང་དང། ཕ་སྤུན་པོ་མུ་གསེང་གཉྀས་ནྀ་དཀུ་ལ༎
(195) གཐོགས་སྟེ། དཀུ་རྒྱལ་པ་འི་ནང་དུ་ཡང་གཐོགས་སོ༎ དབའས་དབྱྀ་ཚབ་ཀྱི་ཚ་བོ༎ སྟག་པོ་རྗེ་མྱེས་སྣང་དང། མང་པོ་
(196) རྗེ་པུ་ཚབ་གཉྀས་དཀུའ་རྒྱལ་ལ་གཐོགས་སོ༎ ཚེས་པོང་ནག་སེང་གྀ་ནུ་བོ་ན་གུ་དཀུའ་རྒྱལ་ལ་གཐོགས་སོའ༎
(197) འུང་ལྟ་སྟེ། མྱང་དབའས་ དང་གསུམ། ཚེས་པོང་པྲིན་དང་བཞིས༎ གློ་བ་ཉེ་ནས། བྲན་ཁྱྀམ་མང་པོ་དང༎
(198) ཡུལ་ཆེད་པོ་སྩལ་ཏོ༎ བཙན་པོ་འི་བློན་པོར་བཅུག་གོ༎ རྒྱལ་པོ་འདྀ་འི་རིང་ལ༎ ཁྱུང་པོ་སྤུང་སད་ཀྱིས།
(199) རྩང་བོད་ཀྱི་རྗོ་བོ་མར་མུན་མགོ་བཆད་དེ༎ རྩང་བོད་ཁྱིམ་ཉི་གྲི༎ བཙན་པོ་འི་པྱག་དུ་ ། ཟུ་ཙེ་གློ་བ་ཉེ་འོ༎