Old Tibetan Documents Online

Pt_1287/400-536

(400) bnal bar / / lIg myi rhya la shud ke za rtsal ting shags gnang ste / / btsan mo yang lIg myi rhya 'I so nam dang bu srId myi mdzad ching log /
(401) shIg na bzhugs par / / 'dir dral gyI snyan du gda' ste / / btsan mo de ltar log pa bgyIs na / / chab srid kyI dkrugs mar 'gyur [bas?]
(402) de lte bu ma bgyid par / / lIg myi rhya 'I so nam dang bu srid zung shIg ches / / spug gyim brtsan rmang cung bka' stsal te / / mkhar
(403) khyung lung du mchis na / / btsan mo myi bzhugs te / / chab nya la rol zhing / / mtsho ma pang du gshegs nas / / rmang cung ma pang du
(404) mchis te / / btsan mo zha sngar pyag bgyIs na / / btsan mo zhal nas / / btsan po dral gyI zha snga nas / / thugs bde 'am myi bde
(405) zhes bka' stsal to / / thugs bde zhes gsol to / / rmang cung glo ba bde 'am myi bde zhes rmas na / glo ba bde zhes gsol to / /
(406) 'ung gI rjes la / btsan po dral gyis bka' 'dI zhes stsal to zhes gsol to / / btsan mo zhal nas / / rmang cung / btsan po dral
(407) gyi zhal dang 'dra' ste / mgron kyis pyag la 'tshol chig ches pyag la stsal nas / / btsan mos / mgur blangs pa' / /
(408) yul gyi skal pog pa / khyung lung nI rdul mkhar zhig / / mu su nI gzhan na re / pyi bltas nI ngam dang brag / / nang bltas nI gser dang dbyig /
(409) ni g.yar snga ru mchis su nI ma tho 'am / / skya mo ni bseng bseng mo / / bran gyi nI skal pog pa / / gu ge nI rkang pran zhig /
(410) 'khol du nI ma tho 'am / / gu ge nI bdris shing sdang / / zas kyI ni skal pog pa / nya dang nI gro mchis te / 'tshal du nI ma tho 'aM
(411) nya gro nI bcha' zhing kha' / / pyugs kyi nI skal pog pa / sha dang nI rkyang mchis ste / / 'tsho ru nI ma tho 'am / sha rkyang
(412) nI btsa' zhing rgod / / kye byang 'brog ni ya bI na / / pho ma 'i nI 'brong gchig pa / / byang 'brog ni 'brong dgum na / / pu nas
(413) nI khus 'debs pa' / / ldong thong nI 'phan gyis thob / / mda' nas nI g.yab 'dor ba skyi 'I nI sha dang spug / / dbus
(414) nas ni 'phen ba / / yar kyI ni lho dang rngegs / / pu nas nI khus btab ching / / mda' nas nI g.yab bor nas / /
(415) de 'i ni bar bar du / pho ma 'I ni [*'brong] bkuM zhing / / thur thur nI pying ba 'I bcud / / ru rgyus nI ldong tong stsald / sha lko ni rngegs
(416) stsald / / lbo shog nI sha spug stsald / / mchil pa 'I nI ru srubs la / nI sha btags shing / g.yas su nI ma yo shig /
(417) g.yon du nI ma rdal chig / / g.yas su nI yo ba na so bya nI gre bo chung / / g.yon du nI rdal ba na sram bu nI gong te dngul / /
(418) mar gyI ni chang chang la gyur gyis nI ma na / / sang pyi nI gnangs slad na sram gyis nI 'tshal ta re / / nya mo ni mthong
(419) rgol zhig / mthong rgol ni mthong la rgol / mchil pa 'I ni snang thogs shig / snang thogs nI snang la thogs / / ring gi
(420) nI god lan dang / sa 'I ni shel myIg gnyis ga myI ni gyI go lta / / je nye nI je nye na / yar pa nI dgung dang nye / dgung skar nI si
(421) lI li / / je nye je nye na / gla skar nI brag dang nye / brag skar nI si li li / / sdur ba nI chab dang nye / gyur sram nI pyo la la' / /
(422) nyen kar nI dog dang nye / 'bras drug ni si lI li / / mal tro nI klum dang nye / skyi bser ni spu ru ru / / je nye ni je
(423) nye na / ra nye ni shug pa thu / / yar gyi ni bye ma la / lhan lhan nI 'gros mo 'di / / skyi 'i nI pur / za dur ni btab
(424) kyang rung zhes / mgur blangs pa 'I rjes la / rmang cung mchid byag bgyis pa las / / btsan po dral la / bka' lan yI ger
(425) gsol ba nI chang ma / btsan po dral gyi zha snga nas thugs bde zhing bzhugs pa glo ba dga' zhing mchis so /
(426) btsan pos bka' stsal pa nI / gum chad gnyis / rngo ji thog gis 'tshal zhing mchis so / / btsan po 'i pyag du
(427) 'dI pul chig ches / zhu g.yag zhu gchig pyag rgyas btab nas bskur ro / / gyim brtsan rmang cung slar / /
(428) btsan po spyan sngar mchIs nas / / btsan mos bka' lan yI ger gsol pa nI chang ma mchis / / mgur blangs pa
(429) 'I tshig nI 'dI zhes mchi / pyag rgyas btab ste skur ba 'dI lags shes gsol pa las / / zhu pyag rgya pye ste /
(430) gzigs na / g.yu rnying bzang po sum cu tsam zhig byung ste / / btsan po dgongs dgongs nas / yu bus lig
(431) myI rhya la rgol phod na nI g.yu thogs shig / / rgol ma phod na nI bud myed dang mtshungs zhu gyon chig zer
(432) ba lta zhes bka' stsal nas / / rje blon blod blod de / / lIg myi rhya 'I srid brlag go / /
(433) $ /:/ rgyal 'dI 'i ring la / / zhang zhung gI rgyal po la drangs ste / chab srid mdzad nas / / zhang zhung gI rgyal po lIg myi rhya srid brlag ste / /
(434) zhang zhung thams chad 'bangs su bkug go / / 'ung gI rjes la / / btsan po rjes 'bangs dgyes skyems ston mo gsol te /
(435) btsan po khri srong brtsan gyis mgur blangs pa / / kye rje 'i nI mtshan ba 'di / / khrI 'i nI srong brtsan zhig / / blon gyI ni mying ba
(436) 'dI / / stong rtsan ni yul zung zhIg / / chibs kyI ni mying ba 'dI / / rngul bu nI gtsang gtsang lta / / gtsang gtsang ni yang yang lta /
(437) yu bu nI rje dang blon / / yar mo ni chu thungs kyis / / mdo nas nI rtsang du bsring / / yar mo nI zheng chungs kyis lho nas nI byang
(438) du bskyed / / ma brun nI mtha' bzhi rgyal / / yu bu nI rje dang blon / / rje 'is nI 'bangs ma gtang / rje 'is nI 'bangs btang
(439) na / gnam mtha'I ni srung du rung / / 'bangs kyis nI rje ma gtang / 'bangs kyIs ni rje btang na / ngas po ni rmad du rung / / mgur
(440) de zhes gsungs so / / mgur gyi lan / / blon stong rtsan gyis gsol pa / rje 'Is ni bka' stsal pa gzha' pyI ni yun kyi
(441) srId / bya 'Is ni zhu pub pa / la pyi nI dro / / glo bo ni mang ku rgya / nams kyang ni yar myi po / gad kyI ni gser po che / /
(442) nams kyang nI pying ba 'I bcud / rje 'is nI 'bangs ma gtang / / rje 'Is ni 'bangs btang na / bya bang nI thang la thas / 'bangs kyis
(443) nI rje ma gtang / 'bangs kyis nI rje btang na / / 'jon mo ni shing ka rebs / / sang pyi ni gnangs slad na nam nam nI zha zha
(444) ru / / ri gang nI khus btab kyang / bya pu ni khus ma gdab / lung gang nI rtas bchags kyang / gser gad nI rtas ma bchag / /
(445) mol mol nI 'cham 'cham na / / bka' mchid nI myis myI mnyan / / 'cham 'cham nI 'drul 'drul na / chags
(446) lam nI chus myi sbang / klu de zhes blangs so / / bla na rje sgam na / khrI srong brtsan / 'og na blon 'dzangs na stong rtsan yul zung /
(447) rje nI gnam ri pyva 'I lugs / / blon po ni sa 'I ngam len gyi tshul / / mnga' thang chen po 'i rkyen du / jI dang jir ldan te / pyi 'i
(448) chab srid nI pyogs bzhIr bskyed / / nang gI kha bso ni myi nyams par lhun stug / 'bangs mgo nag po yang mtho dman nI
(449) bsnyams / dpya' sgyu nI bskyungs / dal du nI mchis / ston dpyid nI bskyal / / 'khor bar nI spyad / 'dod pa nI byin /
(450) gnod pa nI pye / btsan ba nI / sdo ba ni smad / 'jigs pa nI mnan / / bden ba nI bsnyen / 'dzangs pa nI bstod /
(451) dpa' bo nI bkur / smon par nI bkol / / chos bzang srId mtho ste / / myI yongs kyis skyid do / / bod la snga na yI ge
(452) myed pa yang / / btsan po 'di 'I tshe byung nas / / bod kyi gtsugs lag bka' grims ched po dang / blon po 'i rim pa dang / che chung
(453) gnyis kyI dbang thang dang / legs pa zin pa 'I bya dga' dang / nye yo ba 'i chad pa dang / zhing 'brog gi thul ka dang dor ka dang / slungs kyi go bar bsnyams
(454) pa dang / bre pul dang / srang la stsogs pa / / bod kyi chos kyi gzhung bzang po kun / / btsan po khri srong brtsan gyi ring las byung ngo / myi yongs
(455) kyis bka' drin dran zhing tshor bas / / srong brtsan sgam po zhes mtshan gsol to / /
(456) $ /:/ mgar glo ba rings pa'I tshe / / btsan po 'dus srong gis mgur blangs pa' / / kye gna'I ni thog ma ru / gzhe 'i nI dang po la /
(457) dgung sngo nI ma 'og gI / dog mon nI ya stengs na / / gtsug btsugs nI btsugs / mthos te nI dgung myi rdib / / dog mon
(458) nI sding myI nyams / dgung la nI gnyi shar ba / dro dro ni sa la dro / / sgro btags nI btags legs ste / btsa' na nI dpal yang dpal
(459) 'phangs na nI sha yang khums / sha khums nI myi yang gsos / / gye di ring nI sang lta na / / dog srin nI sbur bu 'Is / / bya ltar nI bcos
(460) bcos ste / gnam du nI 'phur 'dod kyang / 'phur du ni 'dab ma mchIs / 'phur du nI 'dab mchis kyang / / dgung sngo ni phang mthos ste /
(461) sprin kyI ni go myi 'da's / / ya ru nI dgung ma slebs / ma ru nI dog ma slebs / ma mtho ni ma dma' ste / / khra 'I ni gzan du
(462) gyurd / / bya pu nI lung chungs na / / 'bangs shIg ni rje ru re / mgar bu nI rje ru re / sbal pa ni 'pur du re / / 'bangs las nI rje re ba /
(463) mthing brang nI gyen du 'gyur / pa bong ni ri la 'drIl / pya mda'I ni smra 'or gyis gyen du nI 'dril 'drIl yang / / sham po ni rtse mo
(464) ru pyin snyam nI leng myi bgyid / / shams po nI gangs drung du snang dang nI zhugs bltam yang / sham po nI gangs myi zhu / yar [chab?]
(465) nI sngon po la chu bchad nI yur drangs kyang / yar chab ni gzhung myi skams / / bod kyi nI spu rgyal du sems shing nI re re yang /
(466) spu rgyal nI gdung myi 'chad / / bya pu ni lung cungs nas / glang zhIg ni langs kyang / / pho ma 'I ni sding po che / langs nI snar myi mnam /
(467) langs ni snar mnam yang / khus btab nI sding myI g.yo' / / mon ka 'I ni stag chIg pa' / bya ldings nI myig myi lta / bsrogs kyang nI spu
(468) myI langs / / tseng ldeng nI bra gu dang / yar lha nI sham po gnyis / gang che nI gang chung ba / / 'greng brgya' nI kun kyang 'tshal / / skyi cu nI sngon mo
(469) dang / yar chab nI chu bo che / rIng ni gang thung ba / / thang lha nI ya bzhur mkhyen / / gnubs mtsho ni kling dgu' dang / grang po ni mtsho le gong /
(470) gang che nI gag chung ba / / sha myed nI gangs kar mkhyen / / pya mda'I ni khang skya dang / pying ba 'I ni stag rtse gnyis / / gang mtho ni dma'
(471) ba / / yar lha nI sham po mkhyen / / bya pu nI lung chungs na / mgar khol nI rmang ba dang / yar lungs ni pying lungs na / lho rngegs ni /
(472) 'phan ba gnyis / / gang 'phan nI rags pa / / gnyI zla ni ya bIs gzigs / lhe 'u rje ni zin dags mkhyen / 'greng brgya' nI kun
(473) kyang 'tshal / yar mo ni langs pas / ba bdag nI ngo ma 'tshal / / 'bangs kyis nI rje bkol tam / rje 'is nI 'bangs bkol ba' /
(474) sngo ni ya bI mkhyen / myI 'is nI rta bzhon nam / rta 'Is ni myi bzhon ba / / pyva 'I ni gtsug mkhan mkhyen / rtsI 'is nI zor gchad
(475) dam / zor gyis nI rtsva gchad pa / dog mon nI ma bi mkhyen / / da tsam nI dgung mtha' yan / / gnyi zla nI spyan gyis gzigs /
(476) dgung sngo ni snyan gyIs gsan / / pyva 'I ni gtsug myi 'gyur / mda'I ni sgro myi 'bog / / bden nam nI brdzun ba 'dI / sang pyi nI gnangs
(477) slad na / 'bangs kyis nI rje myi bkol / rta 'Is ni myi myi zhon / rtsI 'is ni zor myI gchod / / pyIng ba 'I ni stag rtse na / spu rgyal ni
(478) gdung myI 'chad / / dI ring nI sang lta na' / / bya pu nI lung cungs su / 'ur bu nI khyu chig po / 'ur bas nI bskyod drags pas / ma mo ni
(479) khra 'is 'tshal / / 'ur prug nI thang la gram / / sang pyi nI gnangs slad na / nongs shing nI ma 'gyod chig / / gser gyI ni dong ral na
(480) g.yu 'I ni mda' chIg ma / / ma 'phangs nI sha myi khums / 'phangs na ni ral yang stongs / / re na ni gthang du na / re dku' nI
(481) mtshul du dku' / /
(482) $ /:/ btsan po khri 'dus srong / / 'dam gyI cog ro za dang / 'bre mdzad pa 'I tshe / / khe rgad rgyal to re mdo snang gis mchid blangs [pa?]
(483) ru thung nI bsar nga ba / khong khyim nI spyan bu cung / ris bkra' nI bsar nga ba / mon ka 'I ni stag chig pa / btsan te ni myi mkhas pa rgya drug
(484) nI dgung mtha' rje / / nI myi mkhas pa / shu ma nI rgyal ma gnyis / drag ste nI myi mkhas pa mcho gar nI 'brong gi ru / rno ste ni myi
(485) mkhas pa mdo lcags nI ste'u ka ma / 'dzangs shing nI sri zhu ba / yar kyI [*ni] lho rngegs za' / ngan zhing nI pho che ba / 'dam gyi nI cog ro za /
(486) drI ngan ni nya 'I dri / g.ya' ngan nI zangs kyi g.ya' / sku 'I ni ring stod du / g.yang gI ni yugs bab bam / sku 'I ni ring smad du [tshed (/tsher)] kyi ni
(487) yugs lhung ngam / / sngun na nI 'dren pa 'dI / khri gda's nI yul byin dang / mdo grags nI dgung dang nye / / slad nas nI rton pa 'di /
(488) rgyal tshan nI snang grags dang / mu ken nI klu cu rmad / / dbus nas nI 'phen pa 'di / / che 'am nI chung ma 'tshal / / 'dus srong
(489) nI mang po rje / sku la nI 'phrul yang mnga' / / 'og na nI bchibs pa 'dI / / rgyal ma nI mtha' bzhi 'dul / / mgyogs sam
(490) nI bul ma 'tsho / / rmyig rjes nI myis myI mthong / / rje chig nI mang po rje / gshegs so ni mang po rje / bzhugs kyang nI 'od myi dro /
(491) gshegs kyang nI dang ma chags / / cog ro zas mchid blangs pa 'I tshig la / / kye 'dam gyi ni thang kar du / lha gshegs ni
(492) zhal ma 'tshol / / lha gshegs nI zhal 'tshol na / dud de ni pyag kyang 'tshal / / pyag mda' nI sleb kyis 'dzIn / / de 'i ni
(493) man chad la / / dud de ni pyag 'tshal du / sogs bu nI yu ba thungs / / 'greng ste ni pyag 'tshal du / sten kyi ni chos
(494) ma lags / /
(495) $ /:/ bod kyi blon po / / mgar khri 'brIng btsan brod dang / / rgya 'I blon po wong ker zhang she gnyis / / kha dor gyis brgya' ba 'I tshig / / rgya
(496) 'I dmag byIn ched po / / dmag pon wong ker zhang shes / / dpung gis pul nas / / mtsho sngon po pyogs kyI dmag pon / /
(497) mgar khri 'brIng btsan brod 'tshal ba la / / wong ker zhang shes spring / / khre rkyal gang dang / yungs 'bru rkyal gang bskur te / /
(498) bod kyi dmag / / stag 'phrang g.yag 'phrang du bgrangs pa 'I grangs kyang nga la yod do / / / glad pa la tshad blangs ste /
(499) zhvar drubs / rkang pa la tshad lham du drubs / / bod kyi dmag thub pa tsam du brlabs nas / / nga 'I dmag 'di snyed
(500) chig yod do / / mgrIm pra mor shong na / / lto ched por zhugs krang / / gIs gnam pyags ched pos btab ste / / gchig
(501) myI dgye 'o / / mgar khrI 'bring gIs lan btab pa' / / mang nyung gI khar myi dor ro / / bye 'u mang mang yang khra chig gI nyod pa' / /
(502) nye 'u mang mang yang sram chIg gi nyod pa / sha ba rva mang ste 'gyen tam / g.yag ru ste / 'gyen pa blta 'o / / thang shIng lo brgyar skyes
(503) pa yang / sta re gchig gI dgra 'o / / chu gzha' gsang du song ba yang / / gru mdom gang gis ska chig chod do / / nas 'bras thang gang skyes
(504) pa yang / rang tag gchIg gi nang du chIb bo / / skar ma gnam gang yod pa yang nyi ma gchIg gi 'od la myed do / / lung pa mda' nas
(505) mye phar chIg mched na / / rI lung gnyIs kyi shIng rtsI kun tshig pa yang yod / / chu myig gchIg gi dngo' nas / dba' rgal zhIg byung na' / / ri
(506) thang gI shing rtsI kun khyer ba yang srId do / / bong pa thang gang gI nang du / / rdo ba gchig 'drIl du bcug na / rdo chag gam / bong pa
(507) chag pa blta 'o / thang ched po gchig la / rtsva khur gchIg dang / smrag shad kyi lcag gchig bzhag na / rtsva sngar 'drul lam
(508) lcag sngun du 'drul pa blta 'o / / chu zangs gang gI nang na / / lan tsa khyor gang btab na / / chu bro 'am / lan tsa bro ba blta 'o / /
(509) 'brug dang klog lte bu lce grangs nyung mod kyong / / gnam mtha' bzhir grags la brtsan zhIng che 'o / / khyod kyi dmag ni' /
(510) mtsho ga 'I sbrang bu dang 'dra' ste / / mang zhIng 'khol la myI phan no / / ri ka 'I na bun dang / myi la myI lci 'o / / nga 'I dmag ni
(511) rtsva mang po la zor ba gchIg gis gchod pa dang chod krang / / g.yag ched po la mda' phra mos 'phangs na sod krang / /
(512) ker zhang shes lan btab pa' / / sgo nga chu ngu / rI ched po 'i ljid kyIs mnan na chogs krang / mye 'ba'r ba / mtsho ched po 'i rlabs kyis
(513) bsad na sod krang / / mgar khrI 'bring gIs lan btab pa' / / rI ched po 'i steng na brag / brag gI kha na shIng / shing gI kha na tshang / tshang
(514) gI kha na sgo nga ste / rI ma rnyil bar brag myI 'dral / brag ma ral bar shIng myi 'chag / shIng ma chag dang tshang myi zhig / tshang myi zhig
(515) par sgo nga myI chag ste / / rIs sgo nga gchag du de ltar myi chogs so / / mye rI ka na 'ba'r ba / chu lung pa na 'bab pas gsad
(516) du myI / / bod kyi spu rgyal nI nyi ma dang 'dra' / / rgya rje nI zla ba dang 'dra ste / / rgyal po ched por 'dra' mod kyong /
(517) gnam mtha' 'og du 'od tha dad do / / che cung gI khar yong myi dor ro / / mtsho ched po 'i nang na / chu srIn rgyal ba'
(518) 'dug na / gnam las che phab ste / / chu srIn rgyal ba chu 'I nang du bsad do / / 'brug dang klag gnyIs kyis lce phab na[s?]
(519) brag las sra ba myed pa yang dral lo / / bod kyi lha btsan po dang / gnam gnyis kyIs bdud bchad na / / 'bal ljI rmang las che
(520) ba myed pa 'I bu / / sa dgu' rIm 'og du sbas pa yang [bzung (/bthud)] de bsad do / / de lta ste / che cung dang mang nyung gI khar de ltar myI dor ro /
(521) de nas rgya 'I dmag / / ker zhang shes byung ba las / / bod kyi dmag pon / blon khri 'brIng gis / dgra thabs / [---]
(522) dang g.yag ltar byas nas / / go bar du g.yul sprad de / / rgya mang po bthungs nas / rgya 'i ro gchig gnam du 'greng ba ya[ng]
(523) [myI?] 'bum bsad pa 'I mtshan ma zhes bya 'o / stag la rgya dur dang rma rgya [dus (/dur)] kyang de nas / rnga rab phan chad / / myang da[ng?] [---]
(524) [---] / dor po la stsogs pa / / rgyal po dang bchas su bkug nas / / so blon sde lnga yang btsugs so / /
(525) [---] [-ng] kog la stsogs pa' / / stod pyogs dang lho pyogs kyi rgyal pran mang po yang bsdus s'o / /
(526) [---] mang po rje stag [---] tshab rgyal to re rgya la bros pa 'I tshe / / pa tshab rgyal to res klu blangs pa' / /
(527) [---] na las / / sman sha nI la 'da's kyang / sha bkra' nI slad na lus / na ning nI
(528) [---] 'gres su nI spang bzangs nas / ma sring nI sdug gis bskyal / tsong ka ni che [cung?]
(529) [---] [rje] 'I ni skal pog pa rgya rje ni bsam lang zhig / pur myI ni skal ba ru rgya
(530) [---] chag pa / / mgar mang po rje stag rtsan gyI mchis brang / / cog ro [za?] khyo dang lhan chig rgya [la?]
(531) [---] mchid blangs pa' / / nyen kar nI stag rtse nas / lcags kyI ni khyi bkye zhing / rma 'I ni [pod (/pong)] bra [na'?]
(532) [---] [dud?] brda' btang / meg le ni glang mar nas / gser gyi nI sha smad 'drogs / / 'drogs so ni
(533) [---] 'da's so nI hab chen gong / / 'drims so ni so rgo rtsa / [bskyangs?] so nI / / yang [rung? stengs?]
(534) [---] nIng snga / jo bo ni stag rtsan dang / rgya rje nI bsam lang [gnyis?] / [bstos? zhing?] nI do re [bnyam?]
(535) [---] [ni? sang?] lta na / / 'brong bu nI skos thag ste / na rtsi nI bshor la 'tshal / ma brun ni rgya rje
(536) skol / /