Old Tibetan Documents Online

Pt_1287/001-199

(1) $ /:/ drI gum btsan po sku chung ba 'I tshe mtshan jIr gdags shes / / ma ma gro zha ma skyi brling ma la drIs na / ma ma 'I mchid nas /
(2) skyI brag mar ba nI rnyil tam ma rnyil / dang ma 'bri spangs nI myes tshig gam ma tshIg / mtsho dam le dbal mtsho ni skams
(3) sam ma skams shes mchi / brag ma rnyIl / mtsho yang ma skams spang yang myes ma tshig ces / ma ma gro zha
(4) ma / rgas nas rna log par thos ste / brag kyang rnyil / spang yang myes tshig / mtsho yang skams shes thos nas / /
(5) 'on tang chu dgum sri dgum gyIs / drI gum btsan por mtshan thog shig ches mchi nas / / drI gum btsan
(6) por mtshan btags nas / mtshan btags / thugs su yang zhugs / lde sras myI 'i myi tshul te / mngon
(7) bar dgung du gshegs pa la stsogs pa 'phrul dang byIn ched po mnga' bas / drod dang dregs ma thub ste / / btsan
(8) 'dran bda' nas / yab 'bangs pha dgu' dang / yum 'bangs tshan gsum la dgra ru rgal g.yag du drung
(9) phod dam zhes bka' stsal na / so so nas kun gyis myI phod ches gsol to / lo ngam rta rdzis kyang myi phod
(10) ces gsol pa las ma gnang ste / / 'ung nas lo ngam gyIs gsol pa / de ltar myI gnang na / lha 'i dkor
(11) mdung rang 'debs dang / ral rang gcod dang / khrab rang gyon dang / phub rang bzur la stsogs pa / 'phrul gyi dkor
(12) ched po mnga' ba 'I rnams bdag la stsal na phod ces gsol to / de nas lha 'I dkor tham shad stsal to /
(13) 'ung nas lo ngam rta rdzI yang / mkhar myang ro sham por sngar mchIs so / btsan po yang myang ro sham por /
(14) gshegs nas / myang ro thal ba tshal du g.yul bres nas / 'ung nas rta rdzI 'i mchid nas / dbu' 'breng zang yag kyang
(15) gchad du gsol / dbu' skas sten dgu' yang kha thur du bstan du gsol nas / de rnam gnyis kyang de bzhin
(16) gnang ngo / / 'ung nas lo ngam gyIs glang po brgya' la / gser gyI mdung rtse nyis brgya' btags te / rgyab du thal
(17) ba bkal nas / glang nang 'thab ste / thal ba gthor nas / de 'I nang du lo ngam gyis brgal to / btsan po dri gum lde
(18) bla gung rgyal gyis gnam du drangs na / lo ngam gyIs mchan nas spre 'u pyung bas / lde bla gung rgyal ni ti tse gangs
(19) rum du gshegs so / / btsan po dri gum yang de ru bkrongs nas / spur zangs brgya' kha sprod gyi nang
(20) du bcug ste rtsang chu 'I gzhung la btang ngo / chab gzhug ser klu 'od de bed de ring mo 'I ltor gshegs so / /
(21) sras gnyis kyang sha khyI dang nya khyIr rkong yul du bkye 'o / / 'ung gI rjes la rhya mo rhul bzhi khugs
(22) dang / sna nam btsan bzhong rgyal gnyis / / srId kyi khyi bo che 'on zugs yar grags dang / 'jang gI zu le ma 'jang dang
(23) 'on rku gnyis kyi spu la dug / 'phrang po 'i brag g.ya' bo 'da' nas / pho la bltas na ltas bzang ste
(24) yul myang ro sham po drung du lhags nas / thabs kyIs bsgyud de / khyI 'i spu la dug yod pa da nga 'I rta rdzis khrid nas /
(25) khyI bzang po lo ngam gyi byugs pa dang / nga 'I rta rdzIs khyi 'I spu la dug bskus pas lag pa byug ste bsad de /
(26) sha blan no / / 'ung gI 'og du bkrags kyI bu lha bu ru la skyes pha tshan dang / / rhya pha tshan du 'thabs so / rhyas
(27) bkrags rabs bchad / dud sna pho lo / / bkrags kyI chung ba gchig bros te / pha mying gI yul du thar to / lto na bu khyer te
(28) song ba byung ngo / / bu spus la 'greng nus tsam nas / ma la myI gang bya gang la rjo bo yod na nga 'i rjo bo gar re / myi gang
(29) bya gang la / pha yod na nga 'i pha ga re zhes zer to / nga la ston chig ces mchi na / ma 'I mchid nas / myI 'u chung kha
(30) ma che shig / rte 'u cung kha ma drag nga myI shes shes byas na / spus kyI bu ngar le skyes kyi mchid nas / nga la myi
(31) bstan na shIr 'gro zhes bgyis pa dang / mas kyang gdod bstan te / khyod kyi pha nI rhyas bsad do / khyod kyi jo bo
(32) btsan po ni / lo ngam rta rdzIs / spur ni zangs brgya' ma kha sprod kyI nang du bcug ste / rtsang po 'i
(33) gzhung la btang ngo / chab gzhug ser tshangs su / klu 'o de ring mo 'i ltor gshegs so / / sras mched
(34) gnyis nI sha khyi dang nya khyIr / rkong yul du bkye 'o / / 'ung nas spus kyi bu ngar la skyes
(35) kyi mchid nas / nga myI rlagi ni rjes gcod / chu rlag gi ni dbres tshol du 'gro zhes mchi nas / song ngo /
(36) rkong yul bre snar du sras sha khyI nya khyi dang yang mjal lo / / klu 'o de bed de ring mo dang yang mjal lo / / btsan
(37) po 'i spur jI 'dod pas blu zhes byas na / gzhan jI yang myI 'dod / myi 'I myig bya myIg ltar 'dug pa 'og nas 'gebs
(38) pa gchig 'dod ces zer nas / / spus kyi bu ngar la skyes kyis / gnam mtha' bzhir btsal kyang myi 'i myig
(39) bya myig dang mtshungs 'og nas 'gebs pa ma rnyed nas / brgyags chad lham / slar ma 'I gan du 'ongs
(40) nas / myI rlag gi nI rjes chod / chu ni dbres kyang rnyed do / sras sha khyi nya khyI dang yang mjald / klu 'o de ring
(41) mo dang yang mjal na / spur gyi glud du / myI 'i myig bya myig dang mtshungs 'og nas 'gebs pa gchig 'dod
(42) ches zer na ma rnyed kyIs / da dung tshol du 'gro dgos kyis / brgyags thog shig ces mchi nas song ngo / /
(43) gang par 'phrun gyi 'og du pyin na / cho myi bya 'I bu mo zhig yur ba byed pa 'I gan du song na / bu khu ljo na
(44) 'dug pa zhig / myig bya myig dang mtshungs 'og nas 'gebs pa gchig 'dug nas / de blu na ji 'dod
(45) ces ma la drIs na / ma na re gzhan myI 'dod / nam nam zha zhar / btsan po rje dbyal zhig nongs na / thor to 'phren
(46) mo ni bcings / ngo la mtshal gyis byugs / lus la ni bzhags / btsan po 'i spur la nI 'tshog / myI la 'phrog
(47) [-]om / zas la nI za 'thung / de ltar bya 'am myi bya zhes mchi nas / de bzhin bgyi bar / mna' bchad mtho'
(48) bchad / dam bgyIs tshIg bgyis / / cho myI bya 'I bu mo khrid de song ngo / / klu 'o de ring mo 'i ltor spur gyI klud du
(49) bcug ste btang ngo / nya lha gnyIs kyis btsan po 'i spur bzung ngo / gyang to bla 'bubs kyi mgur du bang so /
(50) gcung nya khyI nI yab kyi mdad gtong ngo / gcen sha khyI ni yab kyI sku mtshal gnyer du / nya khyi ni
(51) rkong dkar po / dmag sum stong sum rgya zhig dang / mkhar pying bar / yul yab
(52) kyi rje myi bzhugs na / pyi 'brog gdengs pyol pyol gyi cha 'o / dog yab kyi char ma / sa 'on bu spur
(53) khog khog ces gsungs so / men pa 'phreng ba 'I la / ting srab rong rIngs 'da's so / ba /
(54) chos gung dang du gshegs so / myang ro sham por gshegs na / lo ngam pho brgya' nI zangs bu brgya' glad la
(55) phub nas / / lo ngam mo brgya' nI slang nga brang la bchar te ngog go / myang ro sham po phab bo /
(56) 'greng nI btson du bzung / / dud nI bchad nas / ba chos gung dang du / mgur 'dI zhes
(57) / 'a ba nyi nye pa nyid / bya ro ro na mdung gI rtse rang nig / yos ro ro na lham gyi gong ra nig / brla'
(58) brdungs / spur btab / wo de myed spu de myed ches gsungs so / slar pying ba stag rtser gshegs s'o /
(59) yul yab kyi rje ru gshegs so / yul pyi 'brog gdengs myi pyol gyi cha 'o / dog yab kyi chab mchis
(60) kyIs / sa 'on bu spur myI khog gI cha 'o / de zhes mgur / sgyed po 'og gzugs na / zangs rdo
(61) bla nas phab ste / rje ru / / bshos na nI spu de gung rgyal / grongs na nI grang mo gnam bse' /
(62) brtsig / 'greng mgo nag gI rje / dud rngog chags kyi rkyen du / /
(63) $ /:/ btsan po lde pru bo gnam gzhung rtsan gyI ring slan chad / / blon che bgyis pa 'I rabs la / / gna' thog
(64) ma 'da'r kyI bu stong dang rjes byas te / / 'dzangs la dpa' 'o / / glo ba yang nye 'o / / de 'I 'og du rngegs /
(65) dud kyI rjes byas ste / / dpa' la / / de 'I 'og du khu lha bo mgo gar gyis byas te / / dgra la d /
(66) zhIng snying shes / myig rno / / de 'I 'og du lho thang 'bring ya stengs kyis byas te / / pyi 'i dgra thub / /
(67) nang gI khab bso mtho' / / de 'i 'og du rngegs thang yong thang rjes / / dpa' zhing 'dzangs so / /
(68) de 'i 'og du gnubs smon to re sbung brtsan gyis byas te / / snyIng shes myig rno / / de 'I 'og du mthon myi 'bring /
(69) po rgyal btsan nus byas te / / dku' ched po byas nas / / kho na 'i sring mo mthon myI za yar steng / dug bskur /
(70) te btang ba las / / mo na dug 'thungs nas / / btsan nu bkum ba / / de 'I 'og du sna nam / /
(71) ['bring?] tog rjes byas / / de 'i 'og du gnubs khrI do re mthong pos byas / / de 'I 'og du gnubs /
(72) khri dog rje gtsug blon gyis byas / / de 'I 'og du gnubs mnyen to re ngan snang gis byas / / de 'i 'og
(73) du shud pu rgyal to re nga myis byas te / / 'dI yan chad kyi blon po 'phrul dang ldan te / ltag brnyan dang 'dom /
(74) ste / / 'dzangs kyang tshad myed do / / myI de lte bu ma skyes pa tsam gyi tshod do / / de 'i 'og du mong /
(75) khri do re snang tshab kyis / / 'dzangs kyi tshad nI / rtsang bod kyi jo bo mar mun brlags [te?] /
(76) dku' ched po blod pa 'I tshe / / deng pho nya zhIg rings par 'ong ba snyam gis / / pho nya 'i lan myur du /
(77) bgyi 'tshal zhes mchi nas / / pho nya 'I lan ji la ma rag par byas pa las / / 'ung gI rjes la' / /
(78) pho nya mchis nas / / bya myi dgos par / / sngar sug las bgyis / / 'ung tsam mo / /
(79) de 'i 'og du / / mgar khri sgra 'dzI rmun gyis / / 'dzangs rgya dang ltag brnyan nI / / 'dron po myi /
(80) gsum 'grogs te 'gro na / / 'dron po thog ma 'i snying la 'dI sems / / bar ma 'i snying la 'dI / /
(81) sems / tha ma 'I snying la 'dI sems shes / / grogs po la gtam byas pa dang / / bden nam brdzun /
(82) 'dron po gsum kha rmas na / / khrI sgra 'dzI rmun mchi ba bzhin mad de / / 'dzangs kyang / /
(83) nI de tsam mo / / de 'I 'og du myang mang po rje zhang snang gis byas so / / btsan po yab khri slon btsan / /
(84) dgung du gshegs / / sras khrI srong brtsan gyi ring la / / myang mang po rje zhang snang gIs / / sum khams
(85) thams shad 'bangs su dgug par bka' stsol to / / myang mang po rje zhang snang gIs / / 'dzangs kyi
(86) blo sgyu gnyIs kyis / / myI rta gnyis tshegs ma byung bar / / dpya' phab lug rtug gi sgyu / / lce thor to
(87) la brjod de / / 'bangs gnyug ma bzhin du bkug ste 'ung tsam mo / / de 'i 'og du mgar mang
(88) zham sum snang gIs byas so / / mang zham sum snang dang / khu khri snya dgru' zung gnyis / / ral dang brda'
(89) prad ches bgyis te / / gna' btsan po 'bro mnyen gyi ring la / / mthon myi 'bring po rgyal btsan
(90) nus blon che bgyis pa na yang / / glo ba rIngs par / / mgar mang zham sum snang ral dang /
(91) brda' prad de tshor ba skad du bgyis nas / / bzung ste bkyon phab pa na yang / / gshed ma mang zham suM / /
(92) snang gis bgyIs te / / bkuM nas / / mgo bchad pa thog ches blangs te / / snam prag du bcug nas / /
(93) gom pa lnga drug tsam bor ba dang 'gyel ba skad bya 'o / / de 'I 'og du khyung po spung sad zu tses /
(94) byas pa las / / 'o ma lde lod btsan dang regs ma mjal nas / / mkhar khri boms su mchIs te / / khri boms
(95) dku' gang pub nas / btsan po srong brtsan ston mo gsol bar byas te / / glo ba rings pa / mgar yul zung
(96) gIs tshor nas / rang gI mgo bchad de gum mo / / spung sad zu tse 'dzangs kyad kyi tshad ni / / rtsIs gra gsum
(97) zhal ce gra bzhI yang rna bas nyan zhing gchod / myig mangs gra chig kyang rtse na / rgyal / / bya pug ron
(98) khyu gchig nam ka la ba yang / gchig gnyIs gsum bzhi lnga drug ches / bya pyir 'phur
(99) ba yang bgrangs pa las / / bya chig ma tshang na / / khras bsad pa 'dra's ltos shes mchi nas / / myi
(100) yongs kyis bltas pa las / / bya chig khras bkum ste / / spung sad zu tse lte bu / tshor skyen la dku' che / /
(101) snying 'dzangs / / myI chig la tshogs dgu tshogs na / / zu tse lte bu su ga la yang myed do / / de 'i 'og du
(102) mgar stong rtsan yul zung gIs byas so / / yul zung rgas nas / / 'o ma lde lod btsan bcug go' / /
(103) rIng po ma rag par glo ba rings nas bkuM mo / / 'ung nas blon stong rtsan slar bcug ste / lo drug bgyis /
(104) nas / / rgas te guM mo / / skyin bar zhang lon pra mo dang 'bangs kyis dpya'd pa nI / / dba's sum snang /
(105) bcug krang zhes dpyad do / / rje blon gsangs ste bka' btags pa nI / / mgar btsan snya ldom bu rta dang /
(106) mtshungs rIgs kyis blon cher bcug go / / blon che 'I lugs slob pa 'i 'og pon / dba's sum
(107) snang gis byas te / sum snang gum nas / / blon btsan snya ldom bus byas s'o / / de 'I 'og du khu mang po
(108) rje lha zung gIs byas so / / lha zung bkyon phab nas / / dba's khrI gzigs zhang nyen gyis byas so' / /
(109) de nas mgar khrI 'bring btsan brod kyis byas so / / de 'i 'og du dba's khri sum rje rtsang bzher gyis /
(110) byas so' / / de 'i 'og du rngegs mang zham stag tshab gyis byas so / / de 'i 'og du dba's stag
(111) sgra khong lod kyis byas te / / bkyon phab nas / / 'bro cung bzang 'or mang gis byas so / / de 'i 'og
(112) du 'bal skye zang ldong tshab kyis byas so / skye zang ldong tshab bkyon phab nas / / dba's snang bzher
(113) zla brtsan gyis / / de 'i 'og du mgos khri bzang yab lag gIs byas so / / de 'i 'og du /
(114) mchims zhang rgyal zIgs shu teng gIs byas so / / de nas ngan lam stag sgra klu gong gis / /
(115) de 'i 'og du sna nam zhang rgyal tshan lha snang gis byas so / / de 'i 'og du 'bro khri gzu ram
(116) kyis / / de 'i 'og du dba' mang rje lha lod kyis byas so / / de 'i 'og du 'bro khri sum rje stag
(117) snang gIs byas so / / de 'i 'og du dba's rgyal to re stag snyas byas so' / /
(118) $ /:/ mkhar pyIng ba stag rtse na nI rgyal stag bu snya gzIgs bzhugs / / nyen kar rnying pa nI zing po rje stag skya bo mchis / /
(119) sdur ba 'I yu sna na ni / / zIng po rje khri pangs sum mchis / / 'ung nas zIng po rje stag skya bo lta zhig / / jI la yang
(120) log pa gshIn pyogs she dag byed de / / nyes pa nI legs par bcug / legs pa ni nyes par bcug go / /
(121) pa snyIng nye ba / / legs pa 'i srid byas blo bstan pa nI myi nyan / / myI gcam bu ngo za ri byed pa 'I tshig ni / /
(122) ched du yang nyan to / / myI 'dI lte bu 'i yus byung ngo / / myI 'dzangs pa drang mkhrang byed pa dang / / dpa' bo chu gang byed pa /
(123) la sdang ste / rI mo bskyungs / / ma 'os pa 'I chad pa nI nan che 'o / / myi mkho' ba 'I las kyi sna grangs nI mangs so / /
(124) 'ung ltar zIng po rje stag skya bo / / chos log ching srId gyur pas / / rjo bo nyes dgu' byed pa' / / myIg gis / /
(125) mthong yang / / nyes pa 'I blo gdab du ma 'os pa 'I chad pa nan ches / tshig drag gIs / / jI ga sus kyang blo gdab /
(126) ma phod do / / rjo bo ni bla na gthum mo / / khol po nI 'og na skrag go / / rjo bo ni bla na smyo / khol po ni 'og / /
(127) na gram mo / / gchIg la gchig snying myI brtan te / / tha dad du sems so / / jo bo zing po rje ngan zhan te / /
(128) jI la yang log pa gshIn pyogs nyes dgur byed pas / / yul gyi srid kyang dma's so / / myI yongs kyang rjo bo /
(129) la 'khang ngo / / 'ung nas zing po rje stag skya bo 'i blon po / / mnyan 'dzI zung nag pos / / rjo bo la gsol / /
(130) rjo bo ji la yang log pa gshIn pyogs mdzad pas / / skol kyI srid nI srid du ma rung / chos nI chos su
(131) ma rung ste / yul gyI myi dbul / nyams kyI srid dma' ste / na mo brlag zin na jI nongs shes gsol nas /
(132) 'ung nas / zIng po rje stag skya bo nyan du ma rung ste / / 'dI skad zer ba nyes so zhes / / 'dzI zung blon po las /
(133) pyung ngo / / 'ung nas 'dzI zung ma rangs ste / / zIng po rje khri pang sum la ltas nas / / nag po /
(134) skya bo bsad / dre 'u rgal te bse' sga bchag go / / stag skya bo 'i yul / yul yel rab sde bzhi / /
(135) klum ya gsum / / zIng po rje khri pang sum gyIs / 'dus so' / / de 'I dku' 'gel du mkhar
(136) sdur bas bchad de / klum ya sum gyi smad / / mnyan 'dzI zung gi bran du dngar to / / bran gyi sa
(137) rIs kyi nang du / / myang nam to re khru gru dang / smon to re tseng sku spad kyang / / 'dzI zung gI bran du bchad do / /
(138) 'ung nas / 'dzI zung gi chung ma pa tsab zas / myang bran byed pa la / / dregs bkur te / / sdIg bsnol / stu bstan /
(139) nas / myang tseng sku ma rangs te / / zIng po rje khri pang sum la / / mnyan gyI bran byed myi phod ches 'khangs /
(140) ste / / zIng po rje na re / / mnyan 'dzI zung las nga la snying nye myed pa 'I bran du / / khyon 'da' ma
(141) ran la myed do / / rjo mos sdig bsnol stu bstan ba bas / / khar glan yang rjo mo dbang gis / nyes pa
(142) myed do zhes bsgo ste / gsol ba ma gnang ngo / / 'ung gI tshig des tseng sku shin du ma rangs ste yi chad do' / /
(143) 'ung gI rjes la / / zIng po rje 'i mngan dba's bshos to re khru gu dang / / gshen khri bzher 'dron kong gnyis /
(144) 'phren ba 'I rdzing kar 'thabs nas / / gshen kyis dba's bsad do / / dba's kyI pho bo phangs to re dbyi tshab kyis /
(145) zIng po rje la / nu bo gshen kyis bsad pa 'I stong ji gnang zhes gsol nas / / zIng po rjes / / gshen khri bzher /
(146) khol tshab nang blon byed pa'I ngo ma chod de / / dge bas myi dge ba bsad na / bsad du zad do zhes bsgo 'o / /
(147) 'ung gI tshig des / / dbyI tshab shin du ma rangs ste yi chad do / / 'ung nas myang dba's yi chad de / 'grogs /
(148) ste dong ngo / / dbyI tshab ni snga / tseng sku nI 'pyi ste / / khyim du dong ngo / / tseng sku gchig pu pyi na tshur smra ste / chab chab
(149) nI pha rol na / yar chab nI pha rol na / / myI 'i ni myI bu ste / lha 'I ni sras po bzhugs / / rje bden ni bkol /
(150) du dga' / sga bden gyis nI bstad du dga' zhes snying la sems pa khar tor ches byung nas / / dbyi tshab sngun
(151) na 'gro ba 'I rna bar lhangs shes thos ste / / dbyi tshab kyis tshIg de tog ces blangs nas / / tseng sku khyod
(152) zer ba las bden ba myed do / / kho bo yang 'dI las ma rangs pa myed kyis / / khyod sems pa dang myi 'dra'
(153) re zhes mna' bor ro / / 'ung nas / myang dba's gnyIs zing po rje las 'khus te / / btsan po spu rgyal
(154) la glo ba nye bar byas nas / mna' mtho' yang cher bchad do / / 'ung gI 'og du dba's dbyi tshab kyis / / zhang
(155) po mnon bzang to re sron / blo la btags te / / mna' mtho bchad pa las / / bzang to re shi nas / / bu pang
(156) sum 'dron po / / zIng po rje 'i nang kor byed pa blo la mna' mtho' bchad do / / myang smon to res /
(157) tshes pong nag seng blo la btags te / mna' mtho bchad do / / 'ung nas myang dba's mnon dang gsuM gyis /
(158) tshes pong nag seng las prin kyIs / / spu rgyal stag bu 'I snyan du bon nas / / btsan po 'i zhal nas / nga 'i sring
(159) mo zhig kyang / zIng po rje 'i ga na 'dug mod kyi / / khyed zer ba bzhin bya 'o zhes bka' stsal nas / / myang
(160) dba's mnon dang gsum / / bro len ching mkhar pying bar mchIs nas / / nyin zhing nI phag tshal gyi shing
(161) khung na / / mtshan zhing nI pying bar mchi ste / / dbu snyung bro mna' gcod pa 'i tshe / / yar myI 'bangs
(162) kyis dpyad pa' / / myI bzangs nI rta bzangs shig / / nyIn zhing nI phag tshal na / mtshan zhing nI pying
(163) bar mchI' / dgra' 'am nI zin ci 'u zhes dpyad do / / 'ung gI rjes la / zIng po rje la dra ma ma drangs /
(164) rgyal stag bu dgung du / / gdod ma rgyal stag bu 'i snyan du nI / prin tshes pong nag seng gis /
(165) bgyis so / / de tshun chad nI tshes pong nag seng gi bran / / spug gyim tang rmang bus bgyis so / / gyim
(166) tang rmang bu blo la btags na / gnyId log pa na brdol gyis dogs nas / / khyo mo dang myI nyal bar ri la
(167) nyal zhing / nub re mal re 'pho' 'o / / khyo yang [ngal (/nga la)] mtshar gyi yI dags shig bab kyis / / gsang
(168) thub par gyi shig ches / 'ung nas jI zhig byed byed nas / / khyo mo dang gnyIg ka / 'ung nas
(169) khyo mo na re / / khyod lto bo che la / yI dags ma bab kyi / / lto sbyor du nges so zhes byas so / 'ung nas de 'i
(170) nub mo nas mod la ngo byas ste / mdza' nas / nub gnyis sum lhan chig nyal ba ltar byas ste / /
(171) khyo mo 'i lce sos btab ste / / dmur dmur te bchad nas / / khyo mo yang shi 'o / / 'ung gi 'og du
(172) zing po rje la ma drangs par / / gyim tang rmang bu nad kyis btab ste rabs chad de shi 'o / /
(173) $ / / / btsan po slon mtshan dang / slon kol mched gnyIs kyis / / myang sku dang / dba's dbyI tshab dang / dba's myes /
(174) snang dang / dba's pu tshab dang / mnon 'dron po dang / tshes pong nag seng drug / / bro stsal pa 'I tshig nI / / deng phan chad / zing
(175) po rje rgyab du myI dor re / spu rgyal pang du myI len re / / btsan po spu rgyal la glo ba 'drIng re / / mthang grang re / man ngag thub par myi
(176) 'tshal re / pyI ma nang 'tshal re / som nyi bgyId re / / brtul phod par myI 'tshal re / / srog spongs 'tshal re / / btsan po
(177) slon btsan gyis / / bka' jI stsald pa bzhIn myi nyan re / gzhan sus bslus kyang nyan re bar bro stsol to / / myang
(178) tseng cung dang / myang mu gseng dang / tshes pong na gu dang / dba's myes snang / dba's pu tshab rnams bro la / /
(179) de nas dgung thus bgos ste / slar mchis so / / gcung slon kol dang / yum stong tsun gnyIs nI / slad na yul 'tsho' / /
(180) zhIng bzhugs so / / btsan po khri slon btsan gyis / zhabs kyIs btsugs te / dmag khrI dang drangs so / / myang tseng sku / /
(181) dang / mnon 'dron po gnyis nI / / stag pa sha ru la tshun chad / bya gchod ching nyan rnar bkye'o / / dba's dbyI tshab dang / /
(182) tshes pong nag seng gnyis nI / btsan po 'i spyan 'dren no / / chu bo ni rab du btod do / dra la nI dbye ru btIng ngo / mkhar yu
(183) sna nI phab bo / / dgu grI zing po rje nI brlag go / / mang po rje sum bu nI dru gu yul du bros so / yung ba sna man chad / /
(184) rkong bre snar yan chad / btsan po pyag du bon to / / btsan po khri slon btsan gyIs / bka' stsal te / yul ngas po las / /
(185) 'phan yul du myIng spos so / / myang dba's kyis / / mchId blangs pa / / gzus nI lha bon to / slon mtshan slon kol /
(186) gzus nI lha bon to / / prin bya rgod kyis / / tshes pong nag seng gis btags so / rje bden gyIs nI bkol to /
(187) sga bden gyIs ni bstad do / / myI smon rum du byung ngo / / mtshe gzugs rum du 'khrungs so / / de nas yul ngas po 'i /
(188) 'bangs / / dba's dbyI tshab la stsogs pas / / btsan po 'i mtshan gsol pa / / chab srid gnam bas mtho / /
(189) dbu rmog ri bas brtsan te / / gnam rI slon mtshan du / / myang dba's mnon dang gsum gyis / /
(190) zIng po rje 'I srid / / btsan po spu rgyal gyi pyag du dngar to / / de nas gnam ri slon mtshan gyIs pyag lcag gis / /
(191) dras te / / myang tseng sku 'I bya dga'r / / mnyan 'dzI zung gi mkhar sdur ba dang / bran khyIm stong lnga brgya' /
(192) dba's dbyi tshab kyI bya dga'r / / za gad gshen kyi yul sa dang / mal tro pyogs nas bran khyIm stong lnga brgya' stsal to / / mnon 'dron
(193) po'i bya dga'r / kho na 'I pu nu po mnon la stsogs pa bran khyIm stong lnga brgya' stsal to / / tshes pong nag seng gI bya dga'r /
(194) 'on kyI smon mkhar nas / / bran khyim sum brgya' stsal to / / myang tseng cung dang / pha spun po mu gseng gnyIs nI dku la / /
(195) gthogs ste / dku rgyal pa 'i nang du yang gthogs so / / dba's dbyI tshab kyi tsha bo / / stag po rje myes snang dang / mang po
(196) rje pu tshab gnyIs dku' rgyal la gthogs so / / tshes pong nag seng gI nu bo na gu dku' rgyal la gthogs so' / /
(197) 'ung lta ste / myang dba's dang gsum / tshes pong prin dang bzhis / / glo ba nye nas / bran khyIm mang po dang / /
(198) yul ched po stsal to / / btsan po 'i blon por bcug go / / rgyal po 'dI 'i ring la / / khyung po spung sad kyis /
(199) rtsang bod kyi rjo bo mar mun mgo bchad de / / rtsang bod khyim nyi gri / / btsan po 'i pyag du / zu tse glo ba nye 'o / /